قازاقستاندا 2020-جىلى 2 ميلليوننان استام ادامنىڭ زەينەتاقىسى ءوستى
نۇر-سۇلتان. قازاقپارات - «2020 -2022-جىلدارعا ارنالعان رەسپۋبليكالىق بيۋدجەت تۋرالى» زاڭعا سايكەس، 2020-جىلعى 1- قاڭتاردان باستاپ ىنتىماقتى زەينەتاقى مولشەرى %7 عا ءوستى، ال ەڭ تومەنگى زەينەتاقى مولشەرى 38636 تەڭگەنى قۇرادى، دەپ حابارلايدى قازاقپارات ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنە سىلتەمە جاساپ.
مەملەكەتتىك بازالىق زەينەتاقى تولەمىنىڭ مولشەرى %5 عا ءوستى، ونىڭ ەڭ تومەنگى مولشەرى 16839 تەڭگەنى قۇرادى.
بۇل ءوسىم 2 ميلليوننان استام زەينەتكەرگە اسەر ەتتى.
سونىمەن قاتار، 2020-جىلعى 1- قاڭتاردان باستاپ ەڭ تومەنگى كۇنكورىس دەڭگەيىنىڭ وزگەرۋىنە بايلانىستى مۇگەدەكتىگى بويىنشا، سونداي-اق اسىراۋشىسىنان ايرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى %5 عا ارتتى.
ناتيجەسىندە ءبىرىنشى توپتاعى جالپى اۋرۋدان مۇگەدەكتىك بويىنشا بەرىلەتىن مەملەكەتتىك جاردەماقى مولشەرى 59872 تەڭگەنى، ەكىنشى توپ - 47710 تەڭگەنى، ءۇشىنشى توپ - 32431 تەڭگەنى قۇرادى.
اسىراۋشىسىنان ايرىلعاندارعا بەرىلەتىن جاردەماقى اسىراۋىنداعى ادامدار سانىنا بايلانىستى 26818 تەڭگەدەن 65797 تەڭگەگە دەيىن بولدى. سونىمەن بىرگە، جەتىم بالالارعا بەرىلەتىن مەملەكەتتىك جاردەماقى مولشەرى ءارقايسىسى ءۇشىن 36796 تەڭگەنى قۇرادى، ءبىراق وتباسىنىڭ بارلىق مۇگەدەك مۇشەلەرى ءۇشىن 79829 تەڭگەدەن اسپايدى.
بۇل ءوسىم شامامەن 680 مىڭ مەملەكەتتىك الەۋمەتتىك جاردەماقى الۋشىلارعا اسەر ەتتى.
ايلىق ەسەپتىك كورسەتكىش شاماسىنىڭ وزگەرۋىنە بايلانىستى 2020-جىلعى 1- قاڭتاردان باستاپ 1№ جانە 2№ تىزىمدەر بويىنشا مەملەكەتتىك ارنايى جاردەماقىلاردىڭ مولشەرى دە %5 عا ارتتى.
2020-جىلعى 1- قاڭتاردان باستاپ 1№ ءتىزىم بويىنشا مەملەكەتتىك ارنايى جاردەماقىلاردىڭ مولشەرى 24973 تەڭگەنى، 2№ ءتىزىم بويىنشا - 22216 تەڭگەنى قۇرايدى.
