ءبىرىڭعاي جيىنتىق تولەم جۇيەسى 2019 -جىلدان باستاپ ەنگىزىلەدى

زاڭ جوباسى ءوزىن- ءوزى جۇمىسپەن قامتىعان حالىقتىڭ قىزمەتىن فورماليزاتسيالاۋ جانە الەۋمەتتىك قامسىزداندىرۋ جۇيەلەرىنە قاتىسۋىن قامتاماسىز ەتۋ ماقساتىندا ازىرلەنگەن. وزگەرىستەر مەن تولىقتىرۋلار 3 كودەكسكە (سالىق، كاسىپكەرلىك، بيۋدجەت كودەكستەرى) جانە 19 زاڭعا ەنگىزىلەدى.

«زاڭ جوباسىنىڭ نەگىزگى جاڭالىعى بەيرەسمي جۇمىسپەن قامتىلعانداردىڭ قىزمەتىن 2019 -جىلعى 1 -قاڭتاردان باستاپ سالىق ورگاندارىندا تىركەۋدىڭ جەڭىلدەتىلگەن ءتارتىبىن كوزدەيتىن جاڭا قۇقىقتىق رەجيمدى - ءبىرىڭعاي جيىنتىق تولەمدى (ب ج ت) ەنگىزۋدى قامتيدى. اعىمداعى جاعداي كورسەتكەندەي، بەيرەسمي جۇمىسپەن قامتىلۋعا سالىق ورگاندارىندا تىركەلۋ جانە ەسەپتەن شىعۋ كەدەرگىلەرى، تولەم جۇيەلەرىنىڭ كوپتىگى جانە سالىق رەجيمىن انىقتاۋدىڭ قيىندىعى اسەر ەتەدى. بەيرەسمي جۇمىسپەن قامتىلعانداردىڭ قىزمەتىن تىركەۋدى جەڭىلدەتۋ ءۇشىن ءبىرىڭعاي جيىنتىق تولەمدى ەنگىزۋ ۇسىنىلادى»، - دەدى ق ر ەڭبەك جانە حالىقتى الەۋمەتتىك قورعاۋ ءمينيسترى ءمادينا ءابىلقاسىموۆا.

ونىڭ سوزىنە قاراعاندا، ب ج ت- نى تولەۋ بەيرەسمي جۇمىسپەن قامتىلعانداردىڭ قىزمەتىن تىركەۋمەن قاتار، مىندەتتى مەديتسينالىق جانە الەۋمەتتىك ساقتاندىرۋ، زەينەتاقىمەن قامسىزداندىرۋ جۇيەلەرىنە قاتىسۋعا مۇمكىندىك بەرەدى. ءبىرىڭعاي جيىنتىق تولەم قازاقستاننىڭ جۇمىس ىستەيتىن ازاماتتارى ءۇشىن 4 مىندەتتى تولەمدى ءبىر رەتتىك تولەممەن الماستىرادى.

 «ب ج ت- نى تولەۋشىلەر ءۇشىن كىرىس سالىعى جانە الەۋمەتتىك تولەمدەر بويىنشا ەڭ تومەن ستاۆكالار رەسپۋبليكالىق ماڭىزى بار قالالاردا، استانادا جانە وبلىستىق ماڭىزى بار قالالاردا 1 اەك (2525 تەڭگە)، باسقا ەلدى مەكەندەردىڭ تۇرعىندارى ءۇشىن - 0,5 اەك (1263 تەڭگە) دەپ بەلگىلەندى»، - دەپ ناقتىلادى مينيستر.

ءبىرىڭعاي جيىنتىق تولەمنىڭ ۇلەسى: جەكە تابىس سالىعى - 10 پايىزدى؛ مەملەكەتتىك الەۋمەتتىك ساقتاندىرۋ قورىنا الەۋمەتتىك اۋدارىمدار - 20 پايىزدى؛ ءبىرىڭعاي جيناقتاۋشى زەينەتاقى قورىنا زەينەتاقى تولەمدەرى - 30 پايىزدى؛ مىندەتتى الەۋمەتتىك مەديتسينالىق ساقتاندىرۋ قورىنا اۋدارىمدار - 40 پايىزدى قۇرايدى.

«ءبىرىڭعاي جيىنتىق تولەمدى ەنگىزۋ ناتيجەسىندە، بەيرەسمي جۇمىسپەن قامتىلعاندار قاتارىنداعى

500 مىڭ ادامنىڭ قىزمەتىن فورماليزاتسيالاۋ كوزدەلەدى، سونداي- اق 65,4 مىڭ تولەۋشى پاتەنت جانە جەڭىلدەتىلگەن دەكلاراتسيا نەگىزىندە قولدانىستاعى سالىق رەجيمىنەن اۋىسادى دەپ كۇتىلۋدە» ، - دەدى م. ءابىلقاسىموۆا.

جالپى العاندا، ءبىرىڭعاي جيىنتىق تولەمدى ەنگىزۋ بەيرەسمي جۇمىسپەن قامتىلعاندارعا: مىندەتتى الەۋمەتتىك مەديتسينالىق ساقتاندىرۋ جۇيەسىنە قاتىسۋعا جانە سوماسى مەن تۇرلەرى شەكتەلمەگەن مەديتسينالىق قىزمەتتەرگە قول جەتكىزۋگە، مەديتسينالىق مەكەمەلەردى تاڭداۋعا؛ جيناقتاۋشى زەينەتاقى جۇيەسىنە قاتىسۋعا ءارى جۇيەگە قاتىسۋ وتىلىنە قاراي بازالىق زەينەتاقى تولەمىن الۋعا؛ ەڭبەك ەتۋ قابىلەتىنەن، اسىراۋشىسىنان ايىرىلعان جاعدايعا، جۇكتىلىك پەن بوسانۋعا، بالا اسىراپ الۋعا، بالا 1 جاسقا دەيىن ونىڭ كۇتىمىنە بايلانىستى الەۋمەتتىك تولەمدەر الۋعا مۇمكىندىك بەرەدى.

تۇزەتۋلەردىڭ ەكىنشى بلوگى «ءوزىن- ءوزى جۇمىسپەن قامتىعان ادام» انىقتاماسىنا ءارتۇرلى تۇسىنىك بەرۋدى جويۋعا باعىتتالعان. تەرميندەردى ءبىرىڭعاي قولدانۋ ءۇشىن «جۇمىسپەن قامتىلعان ادام»، «جالدامالى جۇمىسكەر»، «تاۋەلسىز جۇمىسكەر» انىقتامالارى ۇسىنىلادى.

اۆتور: رۋسلان عابباسوۆ