جالاقىسى تومەن ازاماتتاردىڭ تابىس سالىعى 2019 -جىلى 10 ەسەگە ازايادى - ەلباسى
بۇل تۋرالى بۇگىن ق ر پارلامەنتى پالاتالارىنىڭ بىرلەسكەن وتىرىسىندا مەملەكەت باسشىسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.
«بارشاڭىزدى جاڭا پارلامەنتتىك ماۋسىمنىڭ باستالۋىمەن قۇتتىقتايمىن. سىزدەر جازدا وڭىرلەردى ارالاپ، ەلدىڭ تىنىس-تىرشىلىگىمەن جەتىك تانىستىڭىزدار. حالىقتى نە تولعاندىراتىنىن، قانداي ماسەلەلەر بار ەكەنىن كوزبەن كورىپ، ءبىلىپ كەلدىڭىزدەر. ول بارشا قازاقستاندىقتاردىڭ ءال-اۋقاتىن جاقسارتۋ جولىنداعى قىزمەتتەرىڭىزگە قاجەت. كەزەك كۇتتىرمەي قولعا الىنۋعا ءتيىستى ماڭىزدى جۇمىستار قازىردىڭ وزىندە جەتكىلىكتى. قوس پالاتانىڭ بىرلەسكەن وتىرىسىندا باسىمدىقتاردى ايقىنداپ، بىردەن ىسكە كىرىسۋىمىز كەرەك. ستراتەگيالىق نىسانا بارىمىزگە بەلگىلى. ول ءوزىمىز قابىلداعان 2050- جىلعا دەيىنگى ستراتەگيانىڭ نەگىزگى الدىعا قويعان ماقساتى 30 ەلدىڭ قاتارىنا قوسىلۋ - ءبىزدىڭ اينىماس مەجەمىز. دايەكتى ساياسات پەن كەشەندى شارالار جۇرگىزىپ، ماقساتتى تۇردە العا باسىپ كەلەمىز»، - دەدى ەلباسى.
وسى رەتتە مەملەكەت باسشىسى بەس الەۋمەتتىك باسىمدىقتى جاريا ەتكەنىن، پارلامەنت پەن ۇكىمەت بىرلەسىپ، جۇمىس ىستەپ، ونى جۇزەگە اسىرۋعا قاجەتتى بارلىق زاڭنامالاردىڭ العاشقى شارتتارىن جاساعانىن ايتتى.
«7-20-25» باعدارلاماسى بويىنشا العاشقى نەسيەلەر بەرىلە باستادى. قوسىمشا 20 مىڭ ءبىلىم گرانتى بەرىلدى. 70 مىڭ ورىندىق جاتاقحانا قۇرىلىسىنا دايىندىق اياقتالدى، كەي وڭىرلەردە باستالدى. جاڭا جىلدان باستاپ جالاقىسى تومەن ازاماتتاردىڭ تابىس سالىعى 10 ەسەگە ازايادى. جەكە ءىس باستاۋعا بەرىلەتىن نەسيەلەر كولەمى 62 ميلليارد تەڭگەگە كوبەيدى. سارى ارقا گاز قۇبىرى قۇرىلىسىنا دايىندىق جۇمىستارى اياقتالىپ قالدى. وسىلايشا مەن جاريالاعان الەۋمەتتىك جاڭعىرۋدىڭ تاعى ءبىر باعدارلاماسىن ىسكە اسىرۋدىڭ بارلىق نەگىزى قالاندى. وسىنى باقىلاپ، ۋاقىتىندا ىسكە اسىرۋ باعىتىندا جۇمىس جاساۋمىمىز كەرەك»، - دەدى نۇرسۇلتان نازاربايەۆ.
