تۇركىستان وبلىسى مەن كاسپي كونۆەنتسياسى - ابايەۆ 2018-جىلدىڭ ەڭ باستى جاڭالىقتارى جايلى

«البەتتە، جىل جەمىستى بولدى، جەڭىستەر مەن جەتىستىكتەر مولشىلىق. قازاقستاننىڭ شەجىرەسى ءۇشىن 2018-جىل ەرەكشە ەستە قالارى ايقىن. بىرىنشىدەن، ءبىزدىڭ ەلدىڭ ب ۇ ۇ قاۋىپسىزدىك كەڭەسىنە ءتوراعالىق ەتۋىن ەرەكشە اتاپ وتەر ەدىم. بۇل - جاھاندىق ءارى گەوساياسي كۇن ءتارتىبىن بەلگىلەيتىن الەمنىڭ ەڭ ءىرى حالىقارالىق ۇيىمىنىڭ باستى ورگانى. سونىمەن بىرگە، بۇل رەتتە ءوز تاۋەلسىزدىگىن بار بولعانى 30 جىلداي ۋاقىت بۇرىن عانا العان مەملەكەتتىڭ ونى باسقارۋ مۇمكىندىگىنە يە بولۋى - ىلۋدە ءبىر كەزدەسەتىن جاعداي. بۇل نەنى بىلدىرەدى؟ بۇل ەڭ الدىمەن ءبىزدىڭ ەلدىڭ، پرەزيدەنتىمىزدىڭ ابىرويىن، كوپ ۆەكتورلى ساياساتتىڭ ءتيىمدى ەكەنىن كورسەتەدى»، - دەيدى ابايەۆ «حابار» تەلەارناسىنداعى «اشىق ديالوگ» باعدارلاماسىندا.

ءمينيستردىڭ ايتۋىنشا، قازاقستانداعى ايتۋلى جاڭالىقتىڭ ەكىنشىسى - شىمكەنت قالاسىنىڭ رەسپۋبليكالىق ماڭىزعا يە بولىپ، تۇركىستان وبلىسىنىڭ قۇرىلۋى بولىپ وتىر.

«بۇل رەتتە مەملەكەت باسشىسى ۋاقتىلى ءارى ءتيىمدى شەشىمدى قابىلداعانىن اتاپ ءوتۋ كەرەك. بۇل دەموگرافيالىق ساياسات تۇرعىسىنان دا، ەكونوميكالىق تۇرعىدا دا ءتيىمدى شەشىم. ايماققا ينۆەستيتسيا تارتۋدا دا ءوز پايداسىن تيگىزەرى انىق. تۇركىستاننىڭ بۇكىل تۇركى الەمىنىڭ رۋحاني وشاعىنىڭ ءبىرى ەكەنىن ۇمىتپاۋ كەرەك. تۇركىستان - ءبىزدىڭ ەلدىڭ ەڭ تانىمال ءارى ەتنومادەني برەندى. ءبىز ونى ارى قاراي دامىتىپ، تۋريستەر ءۇشىن عانا ەمەس، تۇركى الەمىنىڭ زەرتتەۋشىلەرى مەن تاريحشىلارى ءۇشىن دە تانىمال ەتە ءتۇسۋىمىز كەرەك»، - دەيدى داۋرەن ابايەۆ.

ءمينيستردىڭ ايتۋىنشا، ءۇشىنشى ماڭىزدى وقيعا - كاسپي تەڭىزىنىڭ قۇقىقتىق مارتەبەسى تۋرالى كونۆەنتسياعا قول قويىلۋى.

«وسى كونۆەنتسيا كاسپيي تەڭىزىنىڭ جاعاسىنداعى بەس مەملەكەتتىڭ 25 جىلدىق كەلىسسوزىنە نۇكتە قويدى. بۇل قۇجات اتالمىش ەلدەرگە كاسپي تەڭىزىنىڭ رەسۋرستارىن قولدانىپ قانا قويماي، ەڭ الدىمەن قازاقستاننىڭ حالىقارالىق شەكاراسىن بەكەمدەۋگە نۇكتە قويادى. وسىناۋ تاريحي قۇجات - قازاقستاننىڭ كەلەشەكتەگى بۋىنى ءۇشىن اسا اۋقىمدى مۇرا بولىپ قالادى دەپ اۋىز تولتىرىپ ايتۋعا بولادى»، - دەيدى مينيستر.