قازاقستاندا 2018-جىلى 37 مىڭ ادام اۆتوكولىك باسقارۋ قۇقىعىنان ايىرىلدى

بۇل جايىندا ءماجىلىس دەپۋتاتتارىنىڭ رەسمي ساۋالىنا جاۋاپ بەرگەن ق ر ىشكى ىستەر ءمينيسترى قالمۇحانبەت قاسىموۆ ءمالىم ەتكەن، دەپ حابارلايدى قازاقپارات ءتىلشىسى.

ق. قاسىموۆتىڭ جاۋابىنا قاراعاندا، ءى ءى م تاراپىنان ەلىمىزدىڭ جولدارىندا باقىلاۋدى كۇشەيتۋ بويىنشا ءتيىستى شارالار قابىلدانعان. جىل سايىن 2,5 ميلليوننان استام بۇزۋشىلىق انىقتالادى. تەك 2018-جىلى اۆتوكولىكتى ماس كۇيىندە باسقارۋدىڭ 25 مىڭعا جۋىق فاكتىسى انىقتالدى. مۇنان بولەك، جول ءجۇرىسى قوزعالىسى ەرەجەسىن ورەسكەل بۇزعانى ءۇشىن سوت 3,2 مىڭ ادامدى اكىمشىلىك قاماۋعا الدى، 37 مىڭ ادامدى اۆتوكولىكتى باسقارۋ قۇقىعىنان ايىردى. جاياۋ جۇرگىنشىلەردىڭ جول ءجۇرىسى قوزعالىسى ەرەجەسىن بۇزۋىن بولدىرماۋ بويىنشا دا جۇمىستار جۇرگىزىلۋدە. ولاردىڭ تاراپىنان وتكەن جىلى 171 مىڭنان استام جول ءجۇرىسى قوزعالىسى ەرەجەسىن بۇزۋشىلىق انىقتالدى.

«سونىمەن قاتار حالىقارالىق تاجىريبە كورسەتكەندەي، جۇرگىزۋشىلەرگە جانە جاياۋ جۇرگىنشىلەرگە قاتىستى تەك پوليتسيا سانكسيالارىن قولدانۋ ۇزاق ۋاقىتقا ءتيىمدى بولا قويمايدى. سوندىقتان اپاتتىلىق ءۇشىن جاۋاپكەرشىلىكتى تەك «ادامي فاكتورلارعا» جۇكتەۋگە نەگىزدەلگەن جول ءجۇرىسى قاۋىپسىزدىگىنە ءداستۇرلى كوزقاراستى وزگەرتۋدىڭ وبەكتيۆتى قاجەتتىلىگى بار. ءبىزدىڭ كوزقاراسىمىز بويىنشا جول ينفراقۇرىلىمىن دامىتۋ جانە ونى حالىقتىڭ دەڭگەيىنە سايكەس كەلتىرۋ جوعارى دەڭگەيدە كوڭىل ءبولۋدى تالاپ ەتەدى»، - دەدى ول.

ماسەلەن، ءمينيستردىڭ اتاپ وتۋىنشە، تەك سوڭعى 10 جىلدا ەلىمىزدىڭ اۆتوپاركى 3 ميلليون كولىك قۇرالىنىڭ بىرلىگىنەن 4,3 ميلليون كولىك قۇرالى بىرلىگىنە دەيىن ۇلعايدى.

«بۇل ءبولىپ جانە ۇستاپ تۇراتىن قورشاۋى بار كوپ جولاقتى اۆتوماگيسترالدار، ءار ءتۇرلى دەڭگەيلەردەگى كولىكتىك جول ايرىقتارى مەن جاياۋ جۇرگىنشى وتكەلدەرىن، تروتۋارلار، جارىقتاندىرۋ سالۋ ماسەلەلەرىن دەرەۋ شەشۋدى تالاپ ەتەدى. بۇل جول-كولىك وقيعاسىن جاساۋ تاۋەكەلىن ازايتادى»، - دەدى ق. قاسىموۆ.