نۇرسۇلتان نازاربايەۆ ەكسپو-2017 كورمەسىنىڭ باستى جەتىستىگىن اتادى
«ەڭ باستى جەتىستىك - وسى كورمەنى جەڭىپ الۋىمىزدا. 162 مەملەكەت وتكىزگىسى كەلدى. كورمەلەردىڭ تاريحى 100 جىلدى قۇرايدى. ءار تاقىرىپتا، ءار باعىتتا دۇنيەجۇزىندە كورمەلەر وتكىزىلەدى. وسىنىڭ الدىندا ميلانداعى كورمەنى بارىپ كورگەن ەدىم. ول انشەيىن ۋاقىتشا جاسالعان عيماراتتاردىڭ ىشىندە ءوتتى. بىتكەننەن كەيىن بارلىعىن تاراتىپ الىپ كەتتى. سوندىقتان ەڭ ماڭىزدىسى، ءبىز جاس ەل بولعاننان كەيىن قازاقستاندى دۇنيەجۇزىنە كورسەتە ءبىلۋىمىز كەرەك. مۇنىڭ توڭىرەگىندە ءالى كوپ جۇمىس جاساۋ قاجەت»، - دەدى ەلباسى.
ق ر پرەزيدەنتىنىڭ اتاپ وتۋىنشە، ەكسپو-2017 كورمەسىنىڭ وزەگى بولعان بالامالى ەنەرگيا قازىرگى عىلىم مەن تەحنيكانىڭ ەڭ وزىق ۇلگىسى سانالادى.
«كورمە ءبىتتى. كورمە بىتكەننەن كەيىن عيماراتتاردىڭ بارلىعى بەكەر قالمايدى. ءبىزدىڭ پاۆيلونىمىز قازاقستاننىڭ مۋزەيى رەتىندە قالادى. ەكى پاۆيلوندا قارجى ورتالىعى بولادى. ءبىر پاۆيلوندا قازاقستاننىڭ كورمەسى بولادى»، - دەدى نۇرسۇلتان نازاربايەۆ.
مەملەكەت باسشىسىنىڭ سوزىنە قاراعاندا، مۇنان بولەك، ءبىر پاۆيلوندا ءى ت- ستارتاپتار پاركى اشىلادى. وندا جاستارعا، عالىمدارعا جاڭالىقتار اشۋعا بارلىق مۇمكىندىك جاسالادى. سونىمەن قاتار تاعى ءبىر پاۆيلوندا مەكتەپ وقۋشىلارىن بىلىمگە، ماماندىققا باۋليتىن ورتالىق بولادى. «ونى كورەيلەرمەن بىرگە جاساپ جاتىرمىز. ول دا جاستارعا پايدالى»، - دەدى ەلباسى.
قازاقستان پرەزيدەنتى كورمەگە قانشا ادام كەلگەنىن، ونىڭ قانداي پايداسى بولعانىن دا ايتتى.
«2 ميللليون ادام كەلەدى دەپ ويلاپ ەدىك، 4 ميلليونعا جاقىن ادام كەلدى. جالپى، ارى-بەرى كىرىپ شىققان ادامداردىڭ سانى 25 ميلليوننان استى. استاناعا، قازاقستانعا پايداسى كوپ بولدى. 1400 قازاقستاندىق كومپانيا قاتىسىپ، قۇرىلىس ماتەريالدارىن بەردى، قۇرىلىس جۇمىستارىنا قاتىستى. ولار 640 ميلليارد تەڭگەنىڭ قاراجاتى يگەردى. قوناق ۇيلەردىڭ، مەيرامحانالاردىڭ، دۇكەندەر مەن كونسەرت زالدارىنىڭ بارلىعى تولدى. ولاردىڭ بارلىعى اقشا تاپتى، بيزنەس كوتەرىلىپ، قالا بيۋدجەتىنە ۇلكەن قارجى قۇيىلدى. وسىنىڭ بارلىعى پايدالى. نەگىزگىسى بۇكىل دۇنيەجۇزىنەن، 185 ەلدەن ادامدار كەلدى، قازاقستاننىڭ وبلىستارىنان مۇلدەم استانانى كورمەگەندەر كەلدى»، - دەدى مەملەكەت باسشىسى.
اۆتور: مارلان جيەمباي
