ەكسپو-2017: ماجارستان ءوز بايتەرەگىن الىپ كەلدى
ماجار ەلىنىڭ پاۆيلونى جەر رەسۋرستارىن ءتيىمدى پايدالانۋ ماسەلەسىنە ارنالعان. سونىڭ اياسىندا وسى ەلدىڭ بالامالى ەنەرگەتيكا سالاسىنداعى تاجىريبەسىمەن تانىسۋعا بولادى.
ماجارستان كۇن ەنەرگياسىنا باسىمدىق بەرىپ وتىر. ال پاۆيلوننىڭ قاق ورتاسىندا تامىرىن تەرەڭ جايىپ، بۇتاعىن بيىككە سوزعان ۇلكەن بايتەرەك تۇر.
نەگىزگى يدەيا - قورشاعان ورتانى ساقتاي وتىرىپ، تابيعي قۇبىلىستاردىڭ نەگىزىندە ەنەرگيانى ءوندىرۋ. «استانانىڭ سيمۆولى بايتەرەك بولسا، بىزدە ول - ءومىر اعاشى. ول جاعىنان دا ماجار مەن قازاق حالقى ۇقساس. قازاقتار وسى بايتەرەكتى كورىپ، ءبىزدىڭ تاعى ءبىر ۇقساستىعىمىزدى جىلى قابىلدايدى دەپ بىلەمىز. پاۆيلون 90 كۇن بويى جۇمىس ىستەيدى. كورمە اياقتالعانشا ەلشىلىك تولىعىمەن وسى جاققا كوشىپ كەلەتىن شىعار. الايدا ءبىزدىڭ ارىپتەستىك بايلانىستارىمىز وسى پاۆيلوننىڭ اياسىندا عانا ەمەس، كورمەدەن كەيىن دە جالعاساتىنىنا سەنەمىن»، - دەدى ماجارستاننىڭ قازاقستانداعى توتەنشە جانە وكىلەتتى ەلشىسى ناندور كورتەزي پاۆيلوننىڭ سالتاناتتى اشىلۋ راسىمىندە.
ايتا كەتكەن ءجون، ماجارستان ەلىنىڭ پاۆيلونىندا ءبىرقاتار مادەني شارالار ۇيىمداستىرىلادى. سونىڭ ءبىرى - قىپشاق كۇندەرى. وسى مەيرامنىڭ اياسىندا ۆەنگرمەن قازاقتىڭ سالت-داستۇرلەرى اراسىنداعى بايلانىستى جان-جاقتى كورسەتۋ كوزدەلگەن.
