پرەزيدەنت نۇرسۇلتان نازاربايەۆ «ەكسپو-2017» كورمەسىنە قاتىسۋشى مەملەكەتتەر مەن ۇيىمدارعا ريزاشىلىعىن ءبىلدىردى
بۇگىن استانا ەكسپو-2017 كورمەسىنىڭ سالتاناتتى اشىلۋ راسىمىندە ءسوز سويلەگەن قازاقستان پرەزيدەنتى نۇرسۇلتان نازاربايەۆ وسىلاي ءمالىم ەتتى، دەپ حابارلايدى قازاقپارات.
«قىمباتتى قازاقستاندىقتار! قۇرمەتتى قوناقتار، حانىمدار مەن مىرزالار! قازاقستاننىڭ ەلورداسى - اسەم استاناعا قوش كەلدىڭىزدەر! بۇگىن ءبىزدىڭ ەلىمىزدە عانا ەمەس، دۇنيەجۇزىلىك كورمەلەر تاريحىندا ايتۋلى كۇن. قازىر كوپتەن كۇتكەن حالىقارالىق «ەكسپو-2017» كورمەسىنىڭ شىمىلدىعى اشىلدى. وسى سالتاناتتى مەرەكەمەن بارشاڭىزدى شىن جۇرەگىمنەن قۇتتىقتايمىن»، - دەدى مەملەكەت باسشىسى.
بۇدان بولەك، پرەزيدەنت قازاقستاننىڭ ەكسپو كورمەسىن ت م د جانە شىعىس ەۋروپا ەلدەرى اراسىندا تۇڭعىش رەت وتكىزگەلى وتىرعانىن اتاپ ءوتتى. «وسىلايشا قازاق ەلىنىڭ ورداسى ايتۋلى كورمەنى وتكىزگەن الەمدەگى 35 قالانىڭ قاتارىنا قوسىلدى. استانا ءۇش اي بويى بۇكىل ادامزاتتىڭ جەتىستىكتەرىن كورسەتەتىن باستى الاڭعا اينالادى. تاۋەلسىز قازاقستاننىڭ سيمۆولى- استانا ناعىز 21 - عاسىر قالاسى رەتىندە جاڭا قىرىنان تانىلاتىن بولادى»، - دەدى نۇرسۇلتان نازاربايەۆ.
سونىمەن قاتار، ەلباسى كورمەگە الەمنىڭ 115 مەملەكەتى، 22 حالىقارالىق ۇيىمى قاتىسىپ وتىرعانىن اتاپ ءوتتى. «مەن ولاردىڭ بارلىعىنا حالقىمىزدىڭ اتىنان ريزاشىلىق ءبىلدىرىپ، ساتتىلىك تىلەيمىن»، - دەدى ن. نازاربايەۆ.
