ەكسپو-2017: ا ق ش وكىلدەرى شەكسىز ەنەرگيانىڭ كوزىن كورسەتەدى

استانا. قازاقپارات - بۇگىن استانادا ا ق ش- تىڭ قازاقستانداعى توتەنشە جانە وكىلەتتى ەلشىسى دجوردج كرول ءوز ەلىنىڭ ۇلتتىق پاۆيلونىن تانىستىردى، دەپ حابارلايدى قازاقپارات ءتىلشىسى.

ا ق ش پاۆيلونىنىڭ تاقىرىبى - «شەكسىز ەنەرگيا كوزدەرى». 1100 شارشى مەتردى قۇرايتىن پاۆيلون ءۇش زالدان تۇرادى. ءبىرىنشى زالدا قوناقتاردى امەريكالىق ستۋدەنتتەر قارسى الىپ، امەريكا قۇراما شتاتتارىن تانىستىراتىن بولادى. سونىڭ بارلىعى فوتو جانە ۆيدەو سەريالدارىنان كورىنىس تاپپاقشى. امەريكانىڭ وتكەنى جانە بولاشاعى، جەتىستىكتەرى مەن تابىستارى - ءبارى-ءبارى جان-جاقتى كورسەتىلەدى. تۋرا سول جەردە «شەكسىز ەنەرگيانىڭ كوزى نە؟» دەگەن ساۋال قويىلادى.

ەكىنشى زالدا ءۇش ۇلكەن ەكران ارقىلى كورمە تاقىرىبىنا ارنالعان شوۋ ۇيىمداستىرىلادى. ال ءۇشىنشى زالدا «شەكسىز ەنەرگيانىڭ كوزى نە؟» دەگەن ساۋالدىڭ جاۋابىن كورۋگە بولادى. ول ەنەرگيانىڭ كوزى - ادامداردىڭ وزدەرى. «ءبىز ءۇشىن شەكسىز ەنەرگيانىڭ كوزى ول - ادامداردىڭ يدەيالارى مەن ءوزارا قارىم-قاتىناسى»، - دەيدى امەريكالىق ستۋدەنتتەر.

ول ستۋدەنتتەردىڭ ءبىرى - ۆەرا سۆونسون. ءوز ءسوزىن قازاق تىلىندە باستاعان ۆەرا تۋعان اتاسى مەن اپاسىنىڭ تاراز قالاسىندا دۇنيەگە كەلگەنىن جەتكىزدى.

«مەن ءوزىم مينەسوتا شتاتىنداعى ۆيسكونسي ۋنيۆەرسيتەتىندە ءبىلىم الدىم. ءبىر جىلداي ءال-فارابي اتىنداعى قازاق ۇلتتىق ۋنيۆەرسيتەتىندە وقىدىم. قازىر مەن استانا قالاسىمەن جان-جاقتى تانىسىپ ءجۇرمىن. ماعان ول قالا قاتتى ۇنادى. ماماندىعىم - ەكولوگيا. ورتالىق ازيا مەن قازاقستان تابيعاتىنىڭ ەرەكشەلىكتەرىن زەرتتەپ ءجۇرمىن. بۇگىندە ادام ساناسىنىڭ ۇزدىك يدەيالارى مەن جەتىستىكتەرىن پايدالانا وتىرىپ، ءبىز العا قويعان ماقساتتارعا جەتە الامىز. سوندىقتان سول يدەيالاردىڭ ءوزى شەكسىز ەنەرگيانىڭ كوزى بولسا كەرەك»، - دەيدى سۆونسون.

اۆتور: ارمان اسقاروۆ