ەكسپو-2017 كورمەسىنىڭ العاشقى شاراسى نەنى كوزدەيدى؟
«كازەنەردجي» قاۋىمداستىعىنىڭ باس ديرەكتورى بولات اقشولاقوۆتىڭ ايتۋىنشا، مينيسترلەر كونفەرەنسياسىنا 50 دەن استام مەملەكەتتىڭ وكىلى قاتىسادى. ولاردىڭ ىشىندە 20 عا جۋىق ەنەرگەتيكا مينيسترلەرى مەن ۆيتسە-مينيسترلەرى بار. بۇدا بولەك، حالىقارالىق ۇيىمداردىڭ 10 باسشىسى كەلۋى ءتيىس.
«كونفەرەنسيانى ق ر پرەمەر-ءمينيسترى باقىتجان ساعىنتايەۆ اشادى. شارا بارىسىندا قازبا بايلىقتاردى پايدالانۋ، بالامالى قۋات كوزدەرىن دامىتۋ، سونداي-اق ەنەرگيانى ۇنەمدەۋ شارالارىن كۇشەيتۋ جانە تاعى باسقا ماڭىزدى ماسەلەلەرى تالقىلانادى. ال مينيسترلەردىڭ بىرلەسكەن مالىمدەمەسى ەكسپو-2017 كورمەسىنىڭ قورىتىندى قۇجاتىنا كىرەتىن بولادى»، - دەيدى اقشولاقوۆ.
مينيسترلەر استانادا جاسىل تەحنولوگيالار مەن يننوۆاتسيالاردىڭ حالىقارالىق ورتالىعىن قۇرۋ باستاماسىنا دا قولداۋ كورسەتىپ، ونى بىرلەسكەن مالىمدەمەگە ەنگىزەدى دەگەن جوسپار بار.
اتالعان باستامانى مەملەكەت باسشىسى نۇرسۇلتان نازاربايەۆ ب ۇ ۇ اسسامبلەياسىندا جاريالاعان بولاتىن. وعان كوپتەگەن مەملەكەتتەر مەن حالىقارالىق ۇيىمدار قولداۋ كورسەتتى. ەندىگى ماقسات - سول باستامانى ىسكە اسىرۋ.
