14:28, 12 - قاڭتار 2017 | GMT +5
ۋنيۆەرسيادا-2017: الماتى مەتروسى جولاۋشىلاردى تەكسەرۋدى كۇشەيتپەك
الماتى. قازاقپارات - ۋنيۆەرسيادا-2017 ستۋدەنتتىك ويىندارى بارىسىندا الماتى مەتروسى جولاۋشىلاردى تەكسەرۋدى كۇشەيتپەك، دەپ حابارلايدى قازاقپارات ءتىلشىسى مەكەمەنىڭ باسپا ءسوز قىزمەتىنە سىلتەمە جاساپ.

«مەتروپوليتەن» م ق ك ديرەكتورى نۇرلان مۇقانوۆتىڭ ايتۋىنشا، مۇنداي شارالار قاۋىپسىزدىكتى كۇشەيتىپ، لاڭكەستىكتىڭ الدىن الۋعا سەپتىگىن تيگىزبەك.
«جولاۋشىلاردىڭ قول جۇگى، سومكەلەرى تىنتۋدەن وتەدى. ودان قاشقاندار جەراستى جولىنا كىرگىزىلمەيدى. بارلىق جولاۋشىلاردى توزىممەن قاراۋعا شاقىرامىز. بۇل ءبىرىنشى كەزەكتە جولاۋشىلاردىڭ قاۋىپسىزدىگى ءۇشىن جاسالىپ وتىر»، - دەدى ديرەكتور.
مەترو باسشىلىعى پويىزدان قالىپ قويماۋ ءۇشىن ارنايى موبيلدى قوسىمشا جۇكتەپ الۋعا كەڭەس بەرىپ وتىر. سونىڭ ارقاسىندا پويىزداردىڭ ءجۇرۋ كەستەسىن تۋرا ءبىلىپ، ەرتەرەك كەلۋگە بولادى.
جولاۋشىلاردى تەكسەرۋ قازاقستان زاڭناماسىندا رۇقسات ەتىلگەن ارنايى قۇرالدارمەن جۇزەگە اسادى. بۇل ازاماتتاردىڭ كونستيتۋتسيالىق قۇقىعىن بۇزبايدى.
اۆتور: الماس مۇقاش ۇلى