ەكسپو-2017 حالىقارالىق كورمە تاريحىندا ەڭ ءىرى كورمەلەردىڭ ءبىرى بولۋى ىقتيمال

استانا. قازاقپارات - قازاقستان ەكسپو مامانداندىرىلعان كورمەسىنە ەڭ كوپ قاتىسۋشى مەملەكەتتەردى تارتا بىلگەن ۇزدىك ءۇش ۇيىمداستىرۋشىلاردىڭ قاتارىنا ەنۋى ىقتيمال، دەپ حابارلايدى قازاقپارات.

«استانا ەكسپو-2017» ۇلتتىق كومپانياسى» ا ق حالىقارالىق قاتىسۋشىلارمەن جۇمىس دەپارتامەنتىنىڭ باسشىسى يليا ورازاقوۆ، قازاقستاندىق تىلشىلەرمەن بولعان سۇحباتىندا قازىرگى ۋاقىتتا ەكسپو-2017 كورمەسىنە 104 مەملەكەت قاتىساتىندىعىن راستاعاندىعىن اتاپ ءوتتى. دەگەنمەن ءوتىنىش قابىلداۋ مەرزىمى ءالى اياقتالعان جوق، ۇلتتىق كومپانيانىڭ ەسەبى بويىنشا قاتىسۋشىلاردىڭ سانى 110 عا جەتۋى ابدەن مۇمكىن.

«ەگەر 110 مەملەكەت قاتىساتىن بولسا، قازاقستان ەكسپو مامانداندىرىلعان كورمەسىنە ەڭ كوپ قاتىسۋشى مەملەكەتتەردى تارتا بىلگەن ۇزدىك ءۇش ۇيىمداستىرۋشىلاردىڭ قاتارىنا ەنەدى. بۇگىنگى تاڭدا بۇل ءتىزىمدى پورتۋگاليا كوش باستاپ وتىر. وندا ەكسپو كورمەسىنە 140 مەملەكەت قاتىستى. ەكىنشى ورىندا قىتايلىق كورمە تۇر، وعان 121 مەملەكەت قاتىستى. قازاقستاننىڭ ۇزدىك ۇشتىكتى ءتامامدايتىن ۇلكەن مۇمكىندىگى بار»، - دەدى ي. ورازاقوۆ.

ونىڭ سوزىنە قاراعاندا، كورمە اياسىندا ەكسپو-2017 كورمەسىنىڭ «بولاشاق ەنەرگياسى» اتتى تاقىرىبىنا ارنالعان 25 حالىقارالىق كونفەرەنسيا وتەدى. كورمەنىڭ ءوزى 9-10 - ماۋسىمدا شاڭحاي ىنتىماقتاستىعى ۇيىمى سامميتىمەن اشىلادى. ونىڭ ۇستىنە مەملەكەتتەردىڭ شارالار كۇنتىزبەسى، ۇلتتىق كۇندەرىن وتكىزۋ داتالارى انىقتالۋدا.

«ءار مەملەكەت ۇلتتىق كۇندەرىن وتكىزۋگە مۇمكىندىك الادى. ءبىر جەردە جينالعان مەملەكەتتەر ءبىر- ءبىرىن ارالاپ، مادەنيەتتەرىن، ىشكى داستۇرلەرىمەن، ءومىر سالتىمەن تانىسادى. قازىرگى ۋاقىتتا 93 كۇنگە سوزىلاتىن كورمە اياسىندا وتەتىن ۇلتتىق كۇندەردىڭ كۇنتىزبەسىن جاساپ جاتىرمىز»، - دەيدى ول.

ناتيجەسىندە قاتىسۋشى مەملەكەتتەر مەن حالىقارالىق ۇيىمدار «قۇندىلىقتار مەن پرينتسيپتەر. كورمەنىڭ زياتكەرلىك قۇندىلىقتارى» اتتى مانيفەستكە قول قويۋلارى شارت. ءوز كەزەگىندە بۇل قۇجات تاريحي ماڭىزعا يە بولادى دەپ كۇتىلۋدە.

 ەسكە سالا كەتەيىك، ەكسپوكورمەسى استانادا 2017 -جىلدىڭ 10 - ماۋسىمىنان 10 - قىركۇيەگىنە دەيىن جالعاسادى. وعان 2 ميلليوننان استام ادام كەلەدى دەپ كۇتىلۋدە. «ەكسپو-2017» كورمەسىنىڭ تاقىرىبى - بولاشاق ەنەرگياسى». ۇيىمداستىرۋشىلاردىڭ ايتۋىنشا، كورمەگە بۇكىل الەمنەن ەنەرگو تيىمدىلىك، بالامالى ەنەرگيا كوزدەرى سالاسىنداعى جاڭا تەحنولوگيالار اكەلىنەدى.

اۆتور: جاسۇلان جولدىبايەۆ