ەكسپو-2017 كەزىندە باياناۋىل اۋماعىندا اۋە رەيستەرى اشىلماق
بۇل تۋرالى وڭىرلىك كوممۋنيكاتسيالار قىزمەتىندە باياناۋىل اۋدانىنىڭ اكىمى ورازگەلدى قايىرگەلدينوۆ ءمالىم ەتتى.
«ەكسپو-2017 كەزىندە ءبىزدىڭ اۋدانعا تۋريستەر كوپتەپ كەلەدى. قازىرگى ۋاقىتتا، اۋداننىڭ تۋريستىك بازاسىن قۇراستىرۋ بويىنشا جوبامەن جۇمىس ءجۇرىپ جاتىر. ونى ءبىز 1- جەلتوقسانعا قاراي تاپسىرۋىمىز كەرەك. جوبا قابىلدانعان سوڭ كەلەسى جىلدىڭ ءساۋىر ايىندا ونى ىسكە اسىرۋعا كىرىسەمىز. باياناۋىل اۋدانىندا ءۇش كول بار: جاسىباي، تورايعىر جانە سابىندىكول. نەگىزگى تىرەك سوڭعىسىنا باعىتتالاتىن بولادى. سونىمەن قاتار، قاراجار اۋىلىنىڭ قاسىندا جازعى دەمالىس تۇرلەرىمەن قاتار قىسقى دەمالىستى دا جەتىلدىرەمىز. وسى جەردە تاۋ شاڭعىمەن اينالىسۋعا جاعداي جاساساق دەيمىز. بۇدان باسقا، قوناقتارعا ىڭعايلى بولۋى ءۇشىن پاۆلودار- قاراعاندى- استانا باعىتى بويىنشا باياناۋىل ارقىلى شاعىن ۇشاقتار جەلىسىن دامىتۋدى جوسپارلاپ وتىرمىز. ۇشاقتىڭ قونۋىنا ءبىر شاقىرىمدىق الاڭ جەتكىلىكتى، مۇنداي قولايلى جەر سابىندىكولدىڭ ماڭىندا بار. بۇل ماسەلە بويىنشا جەكەمەنشىك تاسىمالداۋشىلار مەن تۋرفيرمالارمەن كەلىسىم ءسوز جۇرگىزىلىپ جاتىر»، - دەدى ورازگەلدى قايىرگەلدينوۆ.
بۇعان قوسا، اۋدانعا تۋريستەر مەن ينۆەستورلاردى تارتۋ ماقساتىندا ولكەنىڭ تاريحى مەن ۇسىنىستارىمەن تانىسۋعا بولاتىن ارنايى سايتتىڭ اشىلۋى جوسپارلانىپ وتىر. ايتا كەتۋ كەرەك، جازعى ۋاقىتتا باياناۋىل اۋدانىنا دەمالۋعا 150 مىڭ ادام كەلەدى.
