مەملەكەت باسشىسىنا «ەكسپو-2017» اياسىندا دەمالىس ايماعىن قۇرۋ تۋرالى باياندالدى

كەڭەسكە پرەزيدەنت اكىمشىلىگىنىڭ باسشىسى نۇرلان نىعماتۋلين، قورشاعان ورتا جانە سۋ رەسۋرستارى ءمينيسترى نۇرلان قاپپاروۆ، استانا قالاسىنىڭ اكىمى يمانعالي تاسماعامبەتوۆ، اقمولا وبلىسىنىڭ اكىمى سەرگەي كۋلاگين، سونداي-اق قورشاعان ورتا جانە سۋ رەسۋرستارى ۆيتسە-ءمينيسترى ەرلان نىسانبايەۆ قاتىستى.
كەڭەس بارىسىندا ەلوردانىڭ اينالاسىندا جاسىل ايماق قالىپتاستىرۋ جۇمىستارىنىڭ قازىرگى احۋالى مەن بۇدان ارعى پەرسپەكتيۆاسى تالقىلاندى.
مەملەكەت باسشىسى 1997 - جىلدان 2013 - جىلعا دەيىن وتىرعىزىلعان اعاش كوشەتتەرىنىڭ جالپى اۋدانى 70 مىڭ گەكتاردى قۇراعانىن، سونىڭ شامامەن 15 مىڭى قالا اۋماعىندا، قالعان 55 مىڭى قالا سىرتىندا ەكەنىن اتاپ ءوتتى.
- استانا- شۋچينسك اۆتوجولىنىڭ بويىندا 3,6 مىڭ گەكتاردان استام اۋماققا اعاش ەگىلدى. مەن ءبىر كەزدەرى الىنىپ، ءالى كۇنگە دەيىن پايدالانىلماي جاتقان جەرلەردىڭ ءبارىن سول اۋماقتاردا اعاش ەگۋ ءۇشىن قايتارىپ الۋعا تاپسىرما بەردىم. ءبىزدىڭ مىندەتىمىز - قالانىڭ وزىندە جانە وعان جاپسارلاس اۋماقتاردا جاسىل جەلەك قالىپتاستىرۋ جانە ونى ساقتاۋ. رەسۋرس بولعان جاعدايدا، استانانىڭ اينالاسىنداعى جاسىل ايماقتى بۋراباي باعىتىنداعى ورمانمەن قوسۋعا بولادى، - دەدى نۇرسۇلتان نازاربايەۆ.
قازاقستان پرەزيدەنتىنە «جاسىل ايماق» تۇجىرىمداماسىن دامىتۋ پەرسپەكتيۆالارى تۋرالى باياندالدى، ونىڭ ءبىرىنشى كەزەڭى اياسىندا 2020 - جىلعا دەيىن جاسىل جەلەك اۋماعىن 100 مىڭ گەكتارعا دەيىن جەتكىزۋ جوسپارلانۋدا. ەكىنشى كەزەڭدە قازىرگى اعاش كوشەتتەرى اراسىنداعى بوس جەرلەرگە اعاش وتىرعىزۋ ارقىلى استانانىڭ جاسىل ايماعىن تىعىزداندىرۋ جۇمىستارى جۇرگىزىلەتىن بولادى.
سونىمەن قاتار نۇرسۇلتان نازاربايەۆقا ەكپە ورماننىڭ جالپى الاڭىن ۇلعايتۋ، «ەكسپو-2017» كورمەسىنە دايىندىق اياسىندا دەمالىس ايماعىن قۇرۋ، سونداي- اق استانا - شۋچينسك كولىك جولى بويىن، ۆياچەسلاۆ سۋ قويماسى مەن «قارابيدايىق» قالدىق سۋ جيناقتاۋشىسىنىڭ اينالاسىن جاسىل جەلەكپەن كومكەرۋ جۇمىستارىنىڭ بارىسى تۋرالى باياندالدى.
كەڭەس قورىتىندىسى بويىنشا مەملەكەت باسشىسى ءبىرقاتار ناقتى تاپسىرمالار بەردى.