ەلباسى «ەكسپو-2017» كەشەنىن 2016-جىلعى قىركۇيەكتە دايىن ەتۋدى تاپسىردى
استانا. قازاقپارات - مەملەكەت باسشىسى «ەكسپو-2017» كورمە كەشەنىنىڭ بولاشاق حالىقارالىق، تاقىرىپتىق پاۆيلوندارىنىڭ، سونداي-اق ساۋىق جانە قىزمەت كورسەتۋشى نىساندارىنىڭ ماكەتتەرىمەن تانىستى، دەپ حابارلادى اقوردانىڭ باسپا ءسوز قىزمەتىنەن.
سونىمەن قاتار، نۇرسۇلتان نازاربايەۆقا كورمەنىڭ ورتالىعى - قازاقستاننىڭ ۇلتتىق پاۆيلونىندا بولاتىن نىساندار جونىندە جان-جاقتى باياندالدى.
كەشەندى ارالاپ كورگەننەن كەيىن، قازاقستان پرەزيدەنتى كەڭەس وتكىزىپ، قۇرىلىس جۇمىستارىنىڭ بارىسىنا توقتالدى. مەملەكەت باسشىسى ىسكە قوسۋ جانە ارلەۋ جۇمىستارىن جۇرگىزۋ ءۇشىن «ەكسپو-2017» كەشەنىن 2016-جىلعى قىركۇيەككە دەيىن دايىن ەتۋ قاجەتتىگىن ايتىپ، جۇمىس كەستەسىن ساقتاۋ ماسەلەسىن اتاپ ءوتتى.
