ۇكىمەت 2016 -جىلدىڭ قىركۇيەگىنە دەيىن بانك سەكتورىنان جۇمىس ىستەمەيتىن كرەديتتەردى ەسەپتەن شىعارادى

استانا. قازاقپارات - ۇكىمەت 2016 - جىلدىڭ قىركۇيەگىنە دەيىن بانك سەكتورىنان جۇمىس ىستەمەيتىن كرەديتتەردى مويىنداپ، ەسەپتەن شىعارادى. بۇگىن پارلامەنت ماجىلىسىندەگى داعدارىسقا قارسى شارالارعا ارنالعان ۇكىمەت ساعاتىندا ق ر ۇلتتىق ەكونوميكا ءمينيسترى ەربولات دوسايەۆ وسىلاي مالىمدەدى.

«اعىمداعى جىلدىڭ قاراشاسىندا ۆاليۋتا نارىعىنداعى تورەلىك جانە الىپساتارلىق مامىلەلەردى ازايتۋ ءۇشىن ۇلتتىق بانك بەلگىلەگەن دياپوزوندا پايىزدىق مولشەرمەلەر ءدالىزىن قولداۋ جونىندەگى بۇرىن مالىمدەگەن مىندەتتەمەلەرىنەن باس تارتقان بولاتىن. جۇمىس ىستەمەيتىن كرەديتتەر تۇرعىسىنان بانك سەكتورىنىڭ بارلىق سۋبەكتىلەرىنە جۇرگىزىلگەن كۇيزەلىستىك تەستىلەۋدىڭ ناتيجەلەرى بويىنشا 2016 - جىلدىڭ قىركۇيەك ايىنا دەيىن ولاردى مويىنداۋ جانە ەسەپتەن شىعارۋ جونىندەگى شارالار قامتىلاتىن بولادى. بۇل قارجى سەكتورىن تۇراقتاندىرۋ شاراسى بولىپ تابىلادى»، دەدى ە. دوسايەۆ.

 ونىڭ ايتۋىنشا، ۇلتتىق بانك پەن ۇكىمەتتىڭ ورتا مەرزىمدى پەرسپەكتيۆاداعى نەگىزگى ماقساتى - 2016-2017 -جىلدارى ينفلياتسيانى 6-8 پايىز دالىزىندە، 2018 - جىلى 5-7 پايىز، 2029 - جىلى 4-6 پايىز، ال 2020 - جىلعا قاراي 3-4 پايىزعا دەيىن تومەندەتۋ.

 «بۇل رەتتە 2016 -جىلدىڭ ساۋىرىندە بازالىق پايىزدىق مولشەرلەمەنى يكەمدى وزگەرتۋ تەتىگى ەنگىزىلەتىن بولادى، بۇل باعا تۇراقتىلىعىن قامتاماسىز ەتۋگە جانە ينفلياتسيا دەڭگەيىن تومەندەتۋگە باعىتتالادى. اقشا- كرەديت ساياساتى وپەراتسيالاردىڭ تيىمدىلىگىن ارتتىرۋعا، ونىڭ اقشا نارىعىنىڭ مولشەرلەمەلەرىنە ىقپالىن كۇشەيتۋگە مۇمكىندىك بەرەدى»، دەدى ە. دوسايەۆ.

اۆتور: قانات مامەتقازى ۇلى