قازاقستان 2016-جىلى ۆيزا بەرۋدىڭ جاڭا ەرەجەسىن ەنگىزەدى
«تولىقتاي العاندا، ۆيزالىق جۇمىس ءبىزدىڭ ايرىقشا باسىمدىعىمىز سانالادى. كەلەسى جىلدىڭ 1- توقسانىندا ءبىز قازاقستاندىق ۆيزا بەرۋدىڭ جاڭا ەرەجەسىن ەنگىزۋدى جوسپارلاپ وتىرمىز. بۇل جاڭا ەرەجەلەردىڭ باستى ءمانى -ۆيزا الۋ ءتارتىبىن جەڭىلدەتۋ، ءبىزدىڭ ەلىمىزگە كەلگىسى كەلەتىن شەتەلدىك ازاماتتار ءۇشىن ونى ىڭعايلى جاساۋ، ارينە، ودان كەيىن ونى زاماناۋي قالىپقا تۇسىرگىمىز كەلەدى»، - دەدى ە. ىدىرىسوۆ.
ءمينيستردىڭ اتاپ وتۋىنشە، بۇل جۇمىستار شەكارا قىزمەتىمەن، ىشكى ىستەر مينيسترلىگىمەن جانە باسقا دا سايكەسىنشە مەملەكەتتىك ورگاندارمەن قارقىندى جۇرگىزىلۋ ۇستىندە. جالپى، ەلىمىزدىڭ ديپلوماتيالىق قىزمەتى قازاقستاندىقتاردىڭ شەتەلگە بارۋىن جانە شەتەلدىكتەردىڭ ءبىزدىڭ ەلىمىزگە كەلۋىن بارىنشا جەڭىلدەتۋدى ماقسات ەتۋدە.
«ءبىز ءتولقۇجاتتىڭ بارلىق تۇرلەرىمەن ۆيزاسىز ساپارلاۋ تۋرالى كەلىسىم جاساسۋ ساياساتىن جۇرگىزۋدەمىز. قازىرگى ۋاقىتتا بىزدە مۇنداي 19 كەلىسىم بار. ياعني، قازاقستاندىقتار جالپى ازاماتتىق تولقۇجاتپەن ۆيزاسىز 19 ەلگە بارا الادى. ءبىز قول قويعان سوڭعى كەلىسىم كۋبا مەملەكەتىمەن ارادا ورىن الدى. ەستەرىڭىزگە سالا كەتسەم، وتكەن جىلى ءبىز مۇنداي كەلىسىمدى برازيليا، مەكسيكا جانە لاتىن امەريكاسىنىڭ باسقا دا ءبىرقاتار مەملەكەتىمەن جاساسقان بولاتىنبىز»، - دەدى مينيستر.
اۆتور: مارلان جيەمباي
