مەملەكەتتىك قىزمەتشىنىڭ مانساپتىق مودەلىنە كوشۋ 2016 - جىلدان باستالادى - س. نۇربەك
«100 ناقتى قادام» جوسپارىنىڭ ىشىندەگى مەملەكەتتىك قىزمەتكەردىڭ مانساپتىق مودەلىنە كوشۋ تۋرالى ماسەلە - وتە دۇرىس شەشىم. حالىقارالىق تاجىريبەگە سۇيەنسەك، اسىرەسە كونتينەتالدى ەۋروپا ەلدەرىندە مانساپتىق مودەل - كاسىبي، مامانداندىرىلعان، تەرەڭدەتىلگەن مەملەكەتتىك قىزمەتكەردى دايارلاۋعا بەت بۇرعان مودەل.
ياعني، ادام اۋەل باستا «مەن مەملەكەتتىك قىزمەتشى بولامىن، مەنىڭ كاسىبىم، مەنىڭ مانسابىم - وسى سالادا بولادى» دەگەن شەشىمگە كەلەدى دە ارنايى جوعارعى وقۋ ورنىنا تۇسەدى. وقۋ ورنىن ءبىتىرىپ، مەملەكەتتىك قىزمەتكە كىرەدى. ياعني، بۇل مودەل اسكەري مودەلدەن شىققان. مىسالى، اسكەري ۋچيليشەنى ءبىتىرىپ، لەيتەنانت بولىپ شىعادى. ارى قاراي اسكەري قىزمەتكە كىرىپ، اعا لەيتەنانت، كاپيتان، مايور، ءسۇيتىپ گەنەرالعا دەيىن وسەدى. مىنە، مەملەكەتتىك قىزمەتتەگى مانساپتىق مودەل وسىعان ۇقسايتىن بولادى»، - دەدى س. نۇربەك.
«ياعني، مەملەكەتتىك قىزمەتكە ءبىر كىرگەن سوڭ ءسىزدىڭ ءوسۋىڭىز ءبىر جۇيەنىڭ ىشىندە بولادى. ساتى- ساتىسىمەن ساياسي لاۋازىمعا جەتەسىز. بۇل مودەلدىڭ مىقتى جاعى قانداي دەگەنگە كەلسەك، بىرىنشىدەن، ادام تالابىن، ءوزىنىڭ ءومىرىن، ءوزىنىڭ بۇكىل ىشكى دۇنيەسىن مەملەكەتتىك قىزمەتكە ارنايدى. ەكىنشىدەن، سوڭعى ۋاقىتتا تاجىريبەسى جوق جاستاردىڭ بىردەن جوعارعى لاۋازىمدارعا كەلۋى قاتتى سىنعا الىنىپ ءجۇر. ال، وسى مانساپتىق مودەلدىڭ ىشىندە بۇنداي ماسەلە شەكتەلەتىن بولادى. ياعني، جوعارعى لاۋازىمعا كەلەمىن دەگەن ادام مەملەكەتتىك قىزمەتتىڭ بۇكىل ساتىسىنان ءوتىپ، تاجىريبە جيناپ، ءپىسىپ بارىپ كەلۋى كەرەك. بۇل وتە جاقسى بەتبۇرىس. سەبەبى، قازىر مەملەكەتتىك باسقارۋدىڭ ءرولى - قوعامدى باسقارۋدا، ەكونوميكانى دامىتۋدا وتە ۇلكەن ءرول اتقارادى» ، - دەپ اتاپ ءوتتى ساراپشى.
ونىڭ ايتۋىنشا، مەملەكەتتىك قىزمەتشىلەردىڭ ۇزدىكسىز بىلىكتىلىگىن ارتتىرۋ تەتىكتەرى دە جولعا قويىلادى.
«مەملەكەتتىك قىزمەتشى جىل سايىن، كۇن سايىن ۇيرەنۋى كەرەك. ياعني، ءومىر باقي وقۋى كەرەك. باسقا ەلدەرگە قاراساق، وقۋ، بىلىكتىلىكتى ارتتىرۋ جۇمىستىڭ ءبىر بولىگى بولىپ كەتكەن. مىسالى، ا ق ش- تا جىلىنا ورتا ەسەپپەن 15-20 كۇن مەملەكەتتىك قىزمەتكەردىڭ وقۋىنا كەتەدى. پروگرەسسيۆتى، مىقتى مەملەكەتتىك جۇيەسى بار مەملەكەتتەردە كەيبىر قىزمەتكەرلەر جىلىنا 60-80 كۇندى وقۋعا ارنايدى. ال بىزدە بىلىكتىلىكتى ارتتىرۋ ۋاقىتى وتە از، قازىر ناقتى سيفردى ايتا الماسام دا، سالىستىرمالى تۇردە الىپ قاراساق، بىزدە بىلىكتىلىكتى ارتتىرۋ ۋاقىتىن كوتەرۋ كەرەك. قازىر «مەملەكەتتىك قىزمەت» تۋرالى جاڭا زاڭ ازىرلەنىپ جاتىر. سول زاڭنىڭ ىشىندە بارلىق ايتىلعان جاڭالىقتار، وزگەرىستەر كورىنىس تاباتىن بولادى. زاڭ 2016 -جىلدان باستاپ كۇشىنە ەنەدى» ، - دەپ تۇيىندەدى ول ءسوزىن.
ايتا كەتەيىك، ق ر پرەزيدەنتى ءوزىنىڭ «100 قادام» ۇلت جوسپارىندا مەملەكەتتىك قىزمەتكە قابىلداۋ راسىمدەرىن جاڭعىرتۋدى، مەملەكەتتىك قىزمەتكە قابىلداۋ تومەنگى لاۋازىمداردان باستالۋى ءتيىس دەگەن بولاتىن. تومەنگى لاۋازىمدارعا كانديداتتاردى رەتتەۋ جانە ودان ءارى لاۋازىمدىق ءوسۋ ىسكەرلىك قاسيەتتەر نەگىزىندە جۇزەگە اسىرىلۋى ءتيىس ەكەندىگىن دە تاپسىردى. سونىمەن قاتار، ءۇش ساتىلى ىرىكتەۋ جۇيەسىن ەنگىزۋ قاجەتتىگىن اتاپ ءوتتى.
اۆتور: جاسۇلان جولدىبايەۆ
