قازاقستاندا جەرگىلىكتى پوليتسيا 2016 - جىلدىڭ 1- قاڭتارىنان جۇمىسىن باستايدى

استانا. قازاقپارات - 2016 - جىلدىڭ 1 - قاڭتارىنان باستاپ قازاقستاندا جەرگىلىكتى پوليتسيا جۇمىسىن باستايدى. ىشكى ىستەر مينيسترلىگى ازىرلەگەن زاڭ جوباسى بۇگىن بەسىنشى سەسسيادا جۇمىسىن باستاعان پارلامەنتتىڭ قاراۋىنا جاقىن كۇندەرى ەنگىزىلەدى.

بۇل تۋرالى ورتالىق كوممۋنيكاتسيالار قىزمەتىندە وتكەن بريفينگ بارىسىندا ق ر ىشكى ىستەر مينيسترلىگى اكىمشىلىك پوليتسيا كوميتەتىنىڭ ءتوراعاسى يگور لەپەحا ءمالىم ەتتى.

 «بۇگىن پارلامەنت بەسىنشى سەسسياداعى جۇمىسىن باستايدى. زاڭ جوباسىنا سايكەس، جەرگىلىكتى پوليتسيا قىزمەتىنىڭ قۇرامىنا ۋچاسكەلىك ينسپەكتورلار، جول- پاترۋلدىك پوليتسيا، يۋۆەنالدى پوليتسيا، تابيعاتتى قورعاۋ پوليتسياسى، سونداي- اق ايەلدەردى زورلىق- زومبىلىقتان قورعاۋ، وتىنىشتەردى قابىلداۋ بولىنىستەرى كىرەدى»، - دەپ حابارلادى ول.

سونداي- اق، زاڭ جوباسىنا سايكەس، جەرگىلىكتى پوليتسيا اكىمدىك پەن ءماسليحات الدىندا جىلىنا كەم دەگەندە ەكى رەت، حالىق الدىندا ءبىر رەت ەسەپ بەرۋگە مىندەتتەلەدى.

اۆتور: كەنجەكەي توقتامۇرات قىزى