قازاقستان 2015-جىلى حالىقارالىق بايلانىستاردى تەرەڭدەتۋ باعدارىن بەلسەندى تۇردە جالعاستىرا تۇسەدى - ن. نازاربايەۆ
استانا. قازاقپارات - قازاقستان 2015-جىلى حالىقارالىق بايلانىستاردى كەڭەيتىپ، تەرەڭدەتە ءتۇسۋ باعدارىن بەلسەندى تۇردە جالعاستىرا تۇسەدى. بۇگىن اقوردادا قازاقستاندا تىركەلگەن شەتەلدىك ديپلوماتيالىق ميسسيا باسشىلارىمەن كەزدەسۋى بارىسىندا ق ر پرەزيدەنتى نۇرسۇلتان نازاربايەۆ وسىلاي ءمالىم ەتتى.
«ءبىزدىڭ باسىمدىقتارىمىز ەشقانداي وزگەرىسسىز قالا بەرەدى، ول ەلىمىزدىڭ سىرتقى ساياسات تۇجىرىمداماسىندا كورىنىس تاپقان. بىلتىرعى جىلدىڭ جەلتوقسانىندا «رەسەي فەدەراتسياسى مەن قازاقستان رەسپۋبليكاسى اراسىنداعى ХХІ عاسىرداعى تاتۋ كورشىلىك جانە وداقتاستىق تۋرالى شارت» كۇشىنە ەندى. بۇل قۇجات ساياسي، مادەني-گۋمانيتارلىق ىنتىماقتاستىقتىڭ، بارلىق سالالارداعى ەكىجاقتى قاتىناستاردىڭ نىعايۋىنا سەپتىگىن تيگىزەدى. ءبىز قىتاي حالىق رەسپۋبليكاسىمەن تەگىس قامتىلاتىن ستراتەگيالىق ىنتىماقتاستىقتى جانە تاتۋ كورشىلىك قارىم-قاتىناسىمىزدى ودان ءارى تەرەڭدەتۋگە نيەتتىمىز. ورتالىق ازيا مەملەكەتتەرىمەن قارىم-قاتىناسىمىزدى ودان ءارى دامىتۋعا ەرەكشە كوڭىل بولەتىن بولامىز. ءبىزدىڭ ءوڭىردىڭ حالىقتارىن تاريحي-مادەني تىلدىك ورتاقتىق بايلانىستىرىپ تۇر»، - دەدى ن. نازاربايەۆ.
بۇدان بولەك، مەملەكەت باسشىسى قازاقستاننىڭ جەتەكشى ساۋدا-ەكونوميكالىق جانە ينۆەستيتسيالىق ارىپتەستەرى بولىپ تابىلاتىن ەۋروپالىق وداق ەلدەرىمەن ىنتىماقتاستىققا دا كۇش سالىناتىنىن اتاپ ءوتتى. ەلباسىنىڭ ايتۋىنشا، بەلسەندى تۇردە دامىپ كەلە جاتقان ا ق ش- پەن ستراتەگيالىق ارىپتەستىكتى نىعايتۋ دا ەلىمىز ءۇشىن ماڭىزدى باعىت بولىپ تابىلادى.
«قازاقستان ازيا-تىنىق مۇحيتى ءوڭىرى ەلدەرىمەن، وڭىرلىك قۇرىلىمدارمەن ەكونوميكالىق، ينۆەستيتسيالىق جانە تەحنولوگيالىق ىنتىماقتاستىقتى بەلسەندى ەتە تۇسەدى. جاقىن تاريحي، رۋحاني بايلانىستارىمىز بار ورتا جانە تاياۋ شىعىس ەلدەرىمەن قازاقستاننىڭ ارىپتەستىك قاتىناستارى دا ەكىجاقتى جانە وڭىرلىك ۇيىمدار اياسىندا ءوربيتىن بولادى. ءبىز اۋعانستاننىڭ ەكونوميكالىق، الەۋمەتتىك دامۋىنا كومەك كورسەتۋدى جالعاستىرا بەرەتىن بولامىز. يراننىڭ يادرولىق باعدارلاماسى اياسىنداعى كەلىسسوزدەردىڭ اعىمداعى جىلى اياقتالاتىنىنا ءۇمىت ارتامىز»، - دەدى ن. نازاربايەۆ.
بۇدان بولەك، مەملەكەت باسشىسى قازاقستاننىڭ افريكا قۇرلىعىمەن، لاتىن امەريكاسى جانە كاريب بايسسەينى ەلدەرىمەن قارىم-قاتىناسى ساتىلاپ دامىپ كەلە جاتقانىن جەتكىزدى. ەلباسىنىڭ ايتۋىنشا، سوڭعى جىلدارى قيىر وڭىرلەردەگى ءبىرقاتار ەلدەردە قازاقستاننىڭ ەلشىلىكتەرى اشىلعان.
ءسوزىنىڭ سوڭىندا قازاقستان پرەزيدەنتى ەلارالىق بايلانىستى دامىتۋعا ۇلەس قوسىپ وتىرعان ەلشىلەرگە زور العىسىن جەتكىزدى.
اۆتور: قانات مامەتقازى ۇلى
