قازاقستان- گەرمانيا اراسىنداعى ساۋدا- ساتتىق كولەمى 2,8 ميلليارد دوللارعا جەتتى
مەملەكەت باسشىسى گەوساياسي جانە ەكونوميكالىق قيىندىقتارعا قاراماستان، بىلتىر ەكىجاقتى ساۋدا- ساتتىق كولەمى 25 پايىزعا ءوسىپ، 2,8 ميلليارد دوللارعا جەتكەنىن ايتتى.
«بۇگىندە گەرمانيا كومپانيالارى ءبىزدىڭ ەكونوميكامىزعا شامامەن 6 ميلليارد دوللار ينۆەستيتسيا قۇيدى. بۇل ينۆەستيتسيانىڭ شامامەن 90 پايىزى شيكىزاتتىق ەمەس سەكتورعا تيەسىلى ەكەنىن ايتا كەتكەن ءجون.
ەلىمىزدە نەمىس كاپيتالىنىڭ ۇلەسى بار 1000 نان استام كومپانيا بەلسەندى جۇمىس ىستەپ جاتىر. ولاردىڭ كوپشىلىگى - الەمگە ايگىلى برەندتەر، ال باسقالارى - ورتا دەڭگەيدەگى وتباسىلىق بيزنەس. نەمىس كومپانيالارىنىڭ بارلىعىن قازاقستانعا شاقىرامىز. باتىلدىلىققا، ناقتىلىققا جانە جاۋاپكەرشىلىككە نەگىزدەلگەن نەمىس بيزنەسىنىڭ ءتاسىلىن باعالايمىز. بۇل قاسيەتتەر بيزنەستەگى تابىس ءۇشىن وتە ماڭىزدى» ، - دەدى قاسىم- جومارت توقايەۆ.
ول قازاقستان گەرمانيانىڭ، ءتىپتى بۇكىل ەۋروپا ەلدەرىنىڭ يندۋسترياسىنا قاجەت تابيعي رەسۋرستاردى يگەرۋدە سەنىمدى سەرىكتەس بولۋعا دايىن ەكەنىن اتاپ ءوتتى.
«بۇگىن تاڭەرتەڭ شتاينمايەر مىرزامەن كەزدەسۋ بارىسىندا تابيعي رەسۋرستاردى بىرلەسىپ بارلاۋ جانە يگەرۋ ىسىندەگى ىنتىماقتاستىعىمىزدى نىعايتۋعا كەلىستىك. بۇل شيكىزات، ونەركاسىپ جانە تەحنولوگيا سالالارىنداعى سەرىكتەستىك تۋرالى ۇكىمەتارالىق كەلىسىمگە تىڭ سەرپىن بەرەدى»، - دەدى پرەزيدەنت.
