مينيستر «2-10-20» جانە «5-10-20» باسپانا باعدارلامالارى كىمگە ارنالعانىن ءتۇسىندىردى

نۇر-سۇلتان. قازاقپارات – ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ مەملەكەتتىك باعدارلاما پاتەرلەرىنىڭ كىمگە بەرىلەتىنىن ءتۇسىندىردى، دەپ حابارلايدى قازاقپارات ءتىلشىسى.

«11-مامىر كۇنى مەملەكەتتىك كوميسسيا وتىرىسىندا باسپانا قۇرىلىسىنداعى ماسەلەلەردى شەشۋ، ونىڭ ىشىندە «وتباسى بانك» ۇلتتىق ينستيتۋتىن قۇرۋ تۋرالى تاپسىرما بەرىلدى. ونىڭ باستى يدەياسى - باسپاناسى جوق ءاربىر قازاقستاندىقتىڭ ورتالىققا جۇگىنىپ، ءوز تابىسىنا سايكەس قولجەتىمدى باسپانا الۋ مۇمكىندىگى. ىرىكتەۋ ازاماتتاردىڭ ساناتىنا قاراي ەمەس، ناقتى تابىسىنا قاراي جۇرگىزىلەدى»، - دەپ ءتۇسىندىردى ب. اتامقۇلوۆ ۇكىمەت ۇيىندە وتكەن بريفينگتە.

مينيستر العاشقى توپقا تابىسى تومەن ازاماتتاردىڭ ەنەتىنىن ايتتى. وتباسىنىڭ ءار مۇشەسىنە ەڭ تومەنگى كۇنكورىس دەڭگەيى - 31200 تەڭگەدەن كەلەتىن وتباسى ارەندالىق باسپانانى الادى. وتباسىنىڭ ءار مۇشەسىنە كۇنكورىس دەڭگەيىنىڭ ەكى ەسە كولەمى - 62,4 مىڭ تەڭگەدەن كەلسە، ولار «2-10-20» باعدارلاماسىمەن %2 باسپانا الا الادى.

«ءار ادامعا كۇنكورىس دەڭگەيىنىڭ 3,1 كولەمىندە - 96700 تەڭگەدەن كەلەتىن تابىسى بار ازاماتتار 5-10-20 باعدارلاماسىمەن باسپانا الا الادى. ال كۇنكورىس دەڭگەيىنىڭ 3,1 كولەمىنەن دە جوعارى تابىس تۇسەتىن وتباسى - 7-20-25 باعدارلاماسى ارقىلى ەكىنشى دەڭگەيلى بانكتەردە پاتەر الادى، بۇل - نارىقتىق يپوتەكا»، - دەدى ب. اتامقۇلوۆ.

اۆتور: ايجان سەرىكجان قىزى