قازاقستان مەن ازەربايجان اراسىندا تاۋار اينالىمىن 1 ميلليارد دوللارعا جەتكىزۋگە بولادى
بۇل تۋرالى ەلىمىزگە رەسمي ساپارمەن كەلگەن ازەربايجان پرەزيدەنتى يلحام اليەۆپەن كەڭەيتىلگەن قۇرامداعى كەزدەسۋ بارىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«ءسىزدىڭ ساپارىڭىز اياسىندا جوعارى مەملەكەتارالىق كەڭەس قۇرۋدى بەكىتەتىن بولامىز. بۇل ەكىجاقتى قارىم-قاتىناسقا تىڭ سەرپىن بەرەرى ءسوزسىز. ءبىزدىڭ ساۋدا-ەكونوميكالىق ءوزارا ءىس-قيمىلىمىزداعى ايتارلىقتاي ىلگەرىلەۋشىلىكتى دە زور قاناعاتتانۋشىلىقپەن اتاپ وتكىم كەلەدى. تاۋار اينالىمى 40 پايىزعا ارتىپ، جارتى ميلليارد دوللارعا جەتتى. ەكونوميكالىق الەۋەتىمىزدى مۇمكىندىگىنشە تولىققاندى اشىپ، بۇل كورسەتكىشتى 1 ميلليارد دوللارعا جەتكىزە الامىز دەپ سەنەمىن. بۇل ءۇشىن بىزدە ەنەرگەتيكا، كولىك، لوگيستيكا، يت، اۋىل شارۋاشىلىعى ونەركاسىپ جانە باسقا دا سالالاردا بايىپتى قور بار»، - دەدى قاسىم-جومارت توقايەۆ.
مەملەكەت باسشىسى مادەني-گۋمانيتارلىق بايلانىس تا رەت-رەتىمەن نىعايىپ كەلە جاتقانىن باسا ايتتى.
«بۇل رەتتە باستى بايلانىستىرۋشى بۋىن ۇلتى ازەربايجان 120 مىڭ ازاماتىمىز بولا الادى جانە ولاردىڭ ءبىر بولىگى بۇگىن كورنەكتى مەملەكەت قايراتكەرى گەيدار اليەۆتىڭ اتىنداعى كوشەنىڭ اشىلۋىنا قاتىسادى»، - دەدى قازاقستان پرەزيدەنتى.
