پاندەميادان بەرى الەۋمەتتىك جەلى قولدانۋشىلارىنىڭ سانى 1 ميللياردتان استام ادامعا ارتتى - مينيسترلىك
بۇل تۋرالى «اشىق» ن ق ا پورتالىندا جاريالانعان «ينتەرنەت-جارناما جانە ونلاين-پلاتفورمالار تۋرالى» زاڭ جوباسىنا قوسىمشا كونسۋلتاتيۆتىك قۇجاتىندا جازىلعان، دەپ حابارلايدى قازاقپارات ءتىلشىسى.
«جىل سايىن ينتەرنەتتەگى جارناماعا الەمدىك شىعىندار ورتا ەسەپپەن %15 عا ءوسىپ كەلەدى. 2021-جىلدىڭ قورىتىندىسى بويىنشا ينتەرنەت جەلىسىندە ىلگەرىلەتۋگە 491,7 ميلليارد دوللار باعىتتالدى. بۇل - ءوسىمنىڭ تاريحي ماكسيمۋمى. اسىرەسە، پاندەميا باستالعاننان بەرى الەۋمەتتىك جەلىلەردىڭ جالپى اۋديتورياسى شامامەن %30 عا ءوستى، ياعني كەيىنگى 3 جىلدا 1 ميللياردتان استام جاڭا پايدالانۋشى قوسىلدى. جىل سايىن الەۋمەتتىك جەلىلەردە وتكىزىلەتىن ۋاقىتتىڭ ۇزاقتىعى، سونداي-اق وسى ماقساتتار ءۇشىن ۇيالى تەلەفوندى پايدالانۋ ارتادى. قازاقستان دا بۇدان شەت قالمايدى جانە ينتەرنەتتىڭ وتاندىق سەگمەنتىندە بارلىق نەگىزگى كورسەتكىشتىڭ ءوسۋى بايقالادى. مىسالى، ستراتەگيالىق جوسپارلاۋ جانە رەفورمالار اگەنتتىگىنىڭ دەرەكتەرى بويىنشا، 2021-جىلى 4 جاستان 76 جاسقا دەيىنگى ينتەرنەت جەلىسىن پايدالانۋشىلار سانى ەل حالقىنىڭ جالپى سانىنىڭ %92,9 بولدى»، - دەلىنگەن «اشىق» ن ق ا پورتالىندا جاريالانعان كونسۋلتاتيۆتىك قۇجاتتا.
قولدانۋشىلار سانى كوبەيگەن سايىن، الاياقتىق قىلمىستار جيىلەيدى. سوندىقتان، اقپارات جانە قوعامدىق دامۋ مينيسترلىگى ءبىرقاتار جاڭا نورمانى ەنگىزە وتىرىپ، قازاقستاندىقتاردىڭ قۇقىقتارى مەن بوستاندىقتارىن قورعاۋ قاجەت دەپ سانايدى. ول ءۇشىن ينتەرنەتتەگى جارناما مەن پلاتفورمالاردىڭ قىزمەتىن رەتتەيتىن جاڭا زاڭ ازىرلەۋ ۇسىنىپ وتىر.
