تاشكەنتتە قۇنى 1 ميلليارد دوللار بولاتىن كۇن باتارەيالارى ورناتىلادى
بۇل تۋرالى وزبەكستان پرەزيدەنتى شاۆكات ميرزيەيەۆ ەلدەگى ەنەرگيا تاپشىلىعى ماسەلەسىنە ارنالعان جيىندا ايتتى، دەپ حابارلايدى قازاقپارات ءتىلشىسى رەسپۋبليكا باسشىسىنىڭ باسپا ءسوز قىزمەتىنە سىلتەمە جاساپ.
وزبەكستان باسشىسى تاشكەنتتە ەلەكتر ەنەرگياسى مەن كوگىلدىر وتىنعا دەگەن سۇرانىس ۇدايى ءوسىپ وتىرعانىن اتاپ ءوتتى. كورشى ەلدە ەنەرگيا تاپشىلىعى پروبلەمالارىن شەشۋ ءۇشىن جاڭارتىلاتىن ەنەرگيانىڭ الەۋەتىن پايدالانۋ جوسپارلانۋدا.
وسىنىڭ ارقاسىندا، ەسەپتەۋلەر بويىنشا، 2023 -جىلى 240 ميلليون كۆت/ساع كولەمىندەگى ەنەرگياعا كۇتىلەتىن سۇرانىستى 4 ەسەدەن استام جابۋعا، 1,08 ميلليارد كۆت/ساع ەنەرگيا وندىرۋگە بولادى»، - دەدى شاۆكات ميرزيەيەۆ.
ول ءۇشىن كوپقاباتتى ۇيلەردىڭ، الەۋمەتتىك نىسانداردىڭ، مەملەكەتتىك جانە جەكە كاسىپورىنداردىڭ، وندىرىستىك ايماقتار مەن اۆتوتۇراقتاردىڭ شاتىرلارىنا جالپى قۋاتى 2000 مۆت كۇن باتارەيالارىن ورناتۋ جوسپارلانۋدا.
«قالا جاڭارتىلاتىن ەنەرگيا كوزدەرىن ەنگىزۋگە 1 ميلليارد دوللار بولەدى»، - دەدى پرەزيدەنت.
بۇدان بۇرىن حابارلانعانداي، وزبەكستاندا 2023 -جىلدان باستاپ مەملەكەتتىك مەكەمەلەر، شارۋاشىلىق نىساندارى مەن شارۋاشىلىقتارى كەزەڭ- كەزەڭىمەن بالامالى ەنەرگيامەن قامتاماسىز ەتۋگە كوشەتىن بولادى.
بيىلعى قىستا وزبەكستان قاتتى اياز كەزىندە اۋقىمدى ەنەرگەتيكالىق داعدارىسقا تاپ بولدى. وزبەكستان باسشىسى قىسقا دايىندىقتىڭ ناشارلىعىنا بايلانىستى ءبىرقاتار جوعارى لاۋازىمدى شەنەۋنىكتەردى قىزمەتىنەن بوساتتى.
ەلوردا مەن رەسپۋبليكانىڭ وڭىرلەرىندەگى اياز بەن كوممۋنالدىق شارۋاشىلىقتىڭ جۇمىسىنداعى كۇردەلى ماسەلەلەر اياسىندا اسكەري دالالىق اسحانالار مەن جىلۋ پۋنكتتەرى ىسكە قوسىلدى. تۇرعىن ءۇي قورىنىڭ ەنەرگيا تيىمدىلىگىن ارتتىرۋ ماقساتىندا وزبەكستان ۇكىمەتى 30 مىڭنان استام كوپقاباتتى ءۇيدى بازالت جابىنىمەن وقشاۋلاپ، بالامالى ەنەرگيا كوزدەرىنە كوشىرۋدى كوزدەپ وتىر.