سىرتقا شامامەن 1 ميلليارد دوللاردى زاڭسىز شىعارۋدىڭ سەگىز فاكتىسى تەكسەرىلۋدە

بۇل تۋرالى ق ر پرەمەر- ءمينيسترىنىڭ ورىنباسارى - قارجى ءمينيسترى ەرۇلان جاماۋبايەۆ ايتتى، دەپ حابارلايدى قازاقپارات ءتىلشىسى.
بۇگىن ءماجىلىستىڭ جالپى وتىرىسىنان كەيىن تىشىلەر مينيستردەن قازاقستان اۋماعىنان شىعارىلعان 100 ميلليارد دوللارعا قاتىستى سۇراق قويدى.
«100 ميلليارد تۋرالى بۇعان دەيىن اقپارات تاراعان بولاتىن. اتاپ ايتقاندا 100 ميللياردتىڭ بارلىعى جىمقىرۋ جولىمەن نەمەسە زاڭسىز الىپ كەتتى دەگەندى بىلدىرمەيدى. جالپى، ەكونوميكادا ترانزاكسيالار، يمپورتتىق ءارى ەكسپورتتىق وپەراتسيالار بولاتىنىن بىلەسىزدەر. سول وپەراتسيالار قارجى اعىنى، ياعني بۇلاردىڭ بارلىعىن بىردەي زاڭسىز جولمەن شىعارىلعان نەمەسە كەلىپ جاتقان قاراجات ەمەس»، - دەدى ە. جاماۋبايەۆ.
وسى ورايدا ول بۇل سالادا زاڭ بۇزۋشىلىقتارعا جول بەرىلسە، بۇل فاكتىلەر قارجىلىق مونيتوريگ اگەنتتىگىنە جىبەرىلەتىنىن ايتتى.
«وسىنداي 8 فاكتى انىقتالىپ، قارجى مينيسترلىگى تاراپىنان جاۋاپتى اگەنتتىككە مالىمەتتەر جىبەرىلدى. بۇل قاراجات 400 ميلليارد تەڭگە شاماسىندا (1 ميلليارد ا ق ش دوللارىنا جۋىق). ەكىنشى تەتىككە توقتالساق، باس پروكۋراتۋرا قۇقىق قورعاۋ ورگاندارىمەن بىرگە ارنايى توپ قۇردى. بۇل توپتىڭ جۇمىسى جالعاسىپ جاتىر. وسى باعىتتا دا بىرنەشە فاكتى انىقتالدى، ياعني سوندا 1 ميلليارد ا ق ش دوللارى سىرتقا زاڭسىز شىعارىلادى دەگەن مالىمەت بار. بۇل فاكتىلەر بويىنشا ناقتى اقپارات بەرە المايمىن، سەبەبى ونى جاۋاپتى قۇقىق قورعاۋ ورگاندارى جاريالايدى. وسى ورايدا قۇپيالىق ماسەلەلەردى ەسكەرۋ كەرەك»، - مينيستر.
ەسكە سالساق، ق ر ۇلتتىق ەكونوميكا ءمينيسترى الىبەك قۋانتىروۆ قازاقستان اۋماعىنان زاڭسىز شىعارىلعان كاپيتال 100 ميلليارد دوللاردان اسۋى مۇمكىن ەكەنىن ايتقان بولاتىن.
اۆتور: رۋسلان عابباسوۆ