قازاقستاندا جەكە كۋالىك پەن ءتول قۇجاتتى 1 كۇندە الۋعا بولادى

استانا. قازاقپارات - قازاقستاندا جەكە كۋالىك پەن ءتول قۇجاتتى بەرۋدى جەدەلدەتۋدىڭ جاڭا قىزمەتى ىسكە قوسىلماق، دەپ حابارلايدى قازاقپارات.

ەندى قۇجاتتاردى استانا، الماتى، اقتوبە جانە شىمكەنتتە ءبىر كۇندە قولعا الۋعا بولادى. وسى ورايدا، ءتيىستى ەرەجەگە وزگەرتۋلەر 2018-جىلعى 23- شىلدەدەگى ۇكىمەتتىڭ قاۋلىسىندا قاراستىرىلعان.

اتاپ ايتقاندا، قازاقستان رەسپۋبليكاسى ازاماتىنىڭ ءتول قۇجاتى، قازاقستان رەسپۋبليكاسى ازاماتىنىڭ جەكە كۋالىگى استانا، الماتى، اقتوبە، شىمكەنت قالالارىندا راسىمدەلگەن كۇننەن باستاپ ءبىر جۇمىس كۇنىنە دەيىن جەدەلدەتىلگەن تارتىپتە بەرىلەدى. ال وبلىس ورتالىقتارىندا ءۇش جۇمىس كۇنگە دەيىن، سونداي-اق اۋدانداردا، وبلىس قالالارىندا جەتى جۇمىس كۇنىنە دەيىن تاپسىرىلادى.

مەملەكەتتىك باجدى ەسەپتەمەگەندە، قۇجاتتاردى جەدەل دايارلاۋ قىزمەتىنىڭ قۇنى اتالعان ءتورت قالا ءۇشىن 4983 تەڭگەنى قۇرايدى.

اتالعان قاۋلى رەسمي جاريالانعان ساتتەن باستاپ 10 كۇن وتكەننەن كەيىن كۇشىنە ەنەدى.