استانانىڭ جاڭا تەمىر جول ۆوكزالى العاشقى جولاۋشىلارىن 1- ماۋسىمدا قارسى الادى
بۇل تۋرالى بۇگىن ق ر ۇكىمەتىندەگى باسپا ءسوز ءماسليحاتىندا ەلىمىزدىڭ ينۆەستيتسيالار جانە دامۋ ءمينيسترى جەڭىس قاسىمبەك ءمالىم ەتتى، دەپ حابارلايدى قازاقپارات.
«مامىر ايىنىڭ ەكىنشى ون كۇندىگىندە، ناقتى ايتار بولسام، 15 ىندە ەكى نىساننىڭ دا قۇرىلىس-مونتاجداۋ جۇمىستارىن اياقتايمىز دەپ جوسپارلاپ وتىرمىز. ودان كەيىن ون كۇن بويى تەستىك سىناق جۇرگىزىلەدى. جاڭا تەمىر جول ۆوكزالى مەن اۋەجايدىڭ جاڭا تەرمينالىندا العاشقى جولاۋشىلاردى ماۋسىمنىڭ بىرىندە قارسى الامىز»، - دەدى جەڭىس قاسىمبەك.
ايتا كەتەيىك، 7- قاباتتى جاڭا ۆوكزالدىڭ جابىق عيماراتىنا ءبىر مەزگىلدە 6 پويىز قاتارىنان كىرە الادى.
تاۋلىگىنە 35 مىڭعا جۋىق جولاۋشىعا قىزمەت كورسەتۋگە قاۋقارلى عيمارات 26 جەدەل ساتىمەن، 52 ەسكالاتورمەن جابدىقتالعان. ال استانا اۋەجايى جاڭا تەرمينالىنىڭ جالپى اۋدانى 47 مىڭ شارشى مەتر. بۇل تەرمينال پايدالانۋعا بەرىلگەننەن كەيىن اۋەجايدىڭ جولاۋشىلار وتكىزۋ قابىلەتتىلىگى جىلىنا 8,2 ميلليونعا دەيىن ارتادى نەمەسە ساعاتىنا 2,5 مىڭ ادامدى قۇرايتىن بولادى.
بۇل نىساندار 10- ماۋسىمدا باستالىپ، 10- قىركۇيەككە دەيىن سوزىلاتىن ەكسپو-2017 حالىقارالىق مامانداندىرىلعان كورمەسى اياسىندا پايدالانۋعا بەرىلگەلى وتىر.
اتالعان كورمەگە 2 ميلليوننان استام ادام كەلەدى دەپ كۇتىلۋدە. ولار كورمەنى كەمىندە ەكى رەت ارالايدى دەپ جوسپارلانعان. جالپى كورمەنى تاماشالاۋشىلاردىڭ 85 پايىزىن قازاقستان ازاماتتارى، ال قالعان 15 پايىزىن شەتەلدىكتەر قۇرايدى. شەتەلدىكتەردىڭ باسىم بولىگى ت م د ەلدەرىنىڭ جانە قىتايدىڭ ازاماتتارى بولادى دەپ كۇتىلۋدە.
قازىرگى ۋاقىتتا 112 مەملەكەت پەن 18 حالىقارالىق ۇيىم ەكسپو كورمەسىنە قاتىساتىندىعىن رەسمي تۇردە راستادى.
