وسىمدىك شارۋاشىلىعىن تەحنيكالارمەن قامتاماسىز ەتۋگە 1 تريلليون تەڭگەدەن استام قاراجات قاجەت
بۇل تۋرالى بۇگىن ماجىلىستە وتكەن ۇكىمەت ساعاتىندا اۋىل شارۋاشىلىعى ءمينيسترى اسىلجان مامىتبەكوۆ ءمالىم ەتتى.
ءسوز اراسىندا مينيستر اۋىل شارۋاشىلىعى سالاسىنداعى ەڭبەك ونىمدىلىگى ماسەلەسىنە توقتالعان بولاتىن. ونىڭ ايتۋىنشا، ەلىمىزدەگى سۋبسيديا ءبولۋ ساياساتى شارۋالاردىڭ اگروتەحنولوگيانى ەنگىزىپ، ەنگىزبەگەنىنە قاراماي بولىنەدى. بۇنىڭ ءوزى تاۋار وندىرۋشىلەردى جاڭا تەحنولوگيامەن، تەحنيكامەن قامتاماسىز ەتۋگە ىنتالاندىرماي وتىر.
«ماسەلەن، بىزدە ماقتا شارۋاشىلىعىمەن اينالىساتىن تاۋار وندىرۋشىلەردىڭ باسىم بولىگى ەسكى تاسىلمەن جۇمىس ىستەيدى، تەحنيكالار جەتىسپەيدى. كوپشىلىك جاعدايدا قول ەڭبەگىنە جۇگىنەدى، سونىڭ ىشىندە قول ەڭبەگىنە كورشى ەلدەردەن ميگرانتتار جالدانادى. ال ەگەر وسىنداي قولمەن اتقارىلاتىن جۇمىستىڭ گەكتارىنا جۇمسالاتىن شىعىستاردى ەسەپتەسەك، بۇل شامامەن 50 مىڭ تەڭگەدەن ارتادى. ەگەر، شارۋالار وسىنىڭ ورنىنا ارنايى كومبايندى پايدالانسا، وندا ونىڭ امورتيزاتسياسىن، كومباينشىنىڭ ەڭبەكاقىسىن، تەحنيكانىڭ بارلىق شىعىندارىن ەسەپكە العاننىڭ وزىندە گەكتارىنا 12-14 مىڭ تەڭگەنى قۇرايتىن ەدى. ياعني، تاۋار ءوندىرۋشى قاراپايىم جينايتىن تەحنيكانىڭ جوقتىعىنان ءار گەكتاردان 40 مىڭ تەڭگەگە دەيىن جوعالتىپ وتىر. ءبىز مۇنداي سەبەتىن، وتاۋ سەكىلدى ماۋسىمدىق جۇمىستاردى اتقاراتىن تەحنيكالار تۋرالى ايتىپ وتىرعان دا جوقپىز»، - دەيدى ا. مامىتبەكوۆ.
وسى رەتتە ۆەدومستۆو باسشىسى سۋبسيديالاردىڭ قازىرگى كۇنى تەحنولوگيالىق جاراقتانۋعا، سونىڭ ىشىندە زاماناۋي تەحنيكالار يەلەنۋگە ەش اسەر ەتپەي وتىرعانىن العا تارتادى.
«قازىرگى كۇنى تەك وسىمدىك شارۋاشىلىعى سالاسىنداعى تەحنيكامەن جاراقتاندىرۋعا قاجەتتىلىك 1 تريلليون تەڭگەدەن اسادى. ءبىزدىڭ ەسەپتەۋىمىزشە بۇل سوما 1 تريلليون 200 ميلليارد تەڭگەدەن اسادى»، - دەدى ول.
اۆتور: قانات مامەتقازى ۇلى
