17:33, 07 - اقپان 2023 | GMT +6
بۇگىن تۇركياداعى 19 قازاقستاندىق ستۋدەنت ەلگە قايتادى
استانا. قازاقپارات - سىرتقى ىستەر مينيسترلىگىنىڭ رەسمي وكىلى ايبەك سمادياروۆتىڭ ايتۋىنشا، تۇركياداعى 19 قازاقستاندىق ستۋدەنت ەلگە قايتادى، دەپ حابارلايدى قازاقپارات ءتىلشىسى.
«مەرسين قالاسىنداعى قۇرمەتتى كونسۋل، تۇركيا ازاماتى احمەت بۋدان قوناق ۇيگە قازاقستاننىڭ 25 ازاماتىن، ونىڭ ىشىندە 19 ستۋدەنتتى پانالاتتى. بۇگىن وسى 19 قازاقستاندىق ستۋدەنت قۇرمەتتى كونسۋلدىقتىڭ ۇيىمداستىرۋىمەن انكاراعا جەتكىزىلدى جانە ولار بۇگىن كەشكە انكارا-استانا رەيسىمەن قازاقستانعا قايتادى»، - دەدى ول ب ا ق وكىلدەرىمەن وتكەن بريفينگىدە.
ونىڭ مالىمەتىنشە، ادانادا دا قازاقستاندىق ستۋدەنتتەر ىستامبۇلعا جەتكىزىلگەن.
«سونداي-اق، كونيا قالاسىنداعى قۇرمەتتى كونسۋل 12 قازاقستاندىق ستۋدەنتكە ادانادان ىستامبۇلعا جەتۋگە جاردەم كورسەتتى. ايتا كەتەتىن جايت، تۇركياداعى ديپلوماتتارىمىز تۇركيانىڭ توتەنشە جاعدايلار باسقارماسىمەن تۇراقتى بايلانىستا»، - دەدى ايبەك سمادياروۆ.