قازاقستاننىڭ وڭدەلگەن تاۋارلار ەكسپورتى 19,8 ميلليارد ا ق ش دوللارىنا جەتتى

نۇر- سۇلتان. قازاقپارات - 2021 -جىلدىڭ قورىتىندىسىندا قازاقستاننىڭ وڭدەلگەن تاۋارلار بويىنشا تاۋار اينالىمى 58,1 ميلليارد دوللاردى قۇرادى.

بۇل 2020 -جىلعا قاراعاندا 12 پايىزعا جوعارى، دەپ حابارلايدى قازاقپارات ءتىلشىسى.

ق ر ساۋدا جانە ينتەگراتسيا مينيسترلىگىنىڭ مالىمەتىنشە، ەلىمىزدەن وڭدەلگەن تاۋارلار ەكسپورتى 2021 -جىلى 28,3 پايىزعا ءوسىپ، 19,8 ميلليارد ا ق ش دوللارىنا جەتتى. قازاقستاننان ەكسپورتتىڭ نەگىزگى وڭدەلگەن تاۋارلارى مىنالار: مىستان جاسالعان مىس جانە كاتودتار، فەرروقورىتپالار، ۋران، ىستىقتاي يلەكتەلگەن لەگيرلەنبەگەن بولاتتان جاسالعان جازىق يلەك، مۇناي ونىمدەرى، كۇمىس، وڭدەلمەگەن اليۋمينيي، وڭدەلمەگەن مىرىش، لەگىرلەنبەگەن بولاتتان جاسالعان جازىق يلەك.

2021 -جىلى قازاقستانعا وڭدەلگەن تاۋارلار يمپورتى 5,1 پايىزعا ارتىپ، 38,3 ميلليارد ا ق ش دوللارى بولدى. ەلىمىزگە يمپورتتىڭ نەگىزگى تاۋارلارى مىنالار: ەسەپتەۋ ماشينالارى، اۆتوموبيلدەرگە ارنالعان شاناقتار، جەڭىل اۆتوموبيلدەر جانە اۆتوموبيلدەر مەن تراكتورلارعا ارنالعان قوسالقى بولشەكتەر، تەلەفون اپپاراتتارى، بولشەك ساۋدا ءۇشىن ولشەپ ورالعان دارىلىك زاتتار. سونداي- اق ۆاكسينالار، قان سارىسۋى، قان دا يمپورتتالعان.

2021 -جىلى قازاقستاننىڭ وڭدەلگەن تاۋارلار بويىنشا نەگىزگى ساۋدا ارىپتەستەرى قاتارىندا رەسەي (وڭدەلگەن تاۋارلاردىڭ ەكىجاقتى ساۋداسىنىڭ جالپى كولەمى 19,97 ميلليارد دوللار)، قىتاي (وڭدەلگەن تاۋارلاردىڭ تاۋار اينالىمى شامامەن 12,7 ميلليارد دوللار) جانە وزبەكستان (وڭدەلگەن تاۋارلارمەن ءوزارا ساۋدا كولەمى 2,6 ميلليارد دوللار) بار.

ال وڭدەلگەن تاۋارلار ساۋداسى بويىنشا نەگىزگى سەرىكتەس ەلدەردىڭ وندىعىنا مىنا ەلدەر كىردى: تۇركيا، گەرمانيا، ا ق ش، ۇلى بريتانيا، جاپونيا، فرانسيا، يتاليا، وڭتۇستىك كورەيا، ۋكراينا، نيدەرلاندى، بەلارۋس، قىرعىزستان.

اۆتور: مارلان جيەمباي