ناۋرىزدا ينفلياتسيا العاش رەت 18 پايىزعا دەيىن تومەندەدى

استانا. قازاقپارات - تۇتىنۋ باعالارىنىڭ يندەكسى 2023-جىلدىڭ ناۋرىزىندا اقپانمەن سالىستىرعاندا 0,4 پايىزدىق تارماققا تومەندەپ، 0,9 پايىزدى قۇرادى.

ازىق-تۇلىك تاۋارلارىنىڭ باعاسى - 1,1 پايىز، ازىق-تۇلىك ەمەس تاۋارلار مەن اقىلى قىزمەتتەر 0,8 پايىزعا ءوستى، دەپ حابارلايدى قازاقپارات ۇلتتىق ستاتبيۋروعا سىلتەمە جاساپ.

ازىق تۇلىك تاۋارلارى اراسىندا كوكونىس باعاسى ايتارلىقتاي وسكەن، ناۋرىزدا قىزاناقتار - 12,7 پايىز، ءتاتتى بۇرىش - 4,9 پايىز، قىرىققابات - 4,5 پايىز، قىزىلشا 3,6 پايىز قىمباتتاعان.

باعا ءوسىمى كۇرىشكە - 3,4 پايىز، سالقىنداتىلعان سۋسىندارعا - 3,3 پايىز، مايلىلىعى 2,5 پايىز ايرانعا - 3,0 پايىز، ۋلتراپاستەرلەنگەن سۇتكە - 2,8 پايىز، باناندارعا - 2,2 پايىز، سيىر ەتىنە جانە قىشقىل ءسۇت ونىمدەرىنە - 2,1 پايىزدان، سارى مايعا - 1,4 پايىز، كەپتىرىلگەن جەمىستەر مەن جاڭعاقتارعا، كونديتەرلىك ونىمدەرگە 1,3 پايىزدان بايقالدى.

قيار - 7,3 پايىز، قانت - 2,1 پايىز، قاراقۇمىق جارماسى - 2 پايىز ارزاندادى.

ازىق-تۇلىك ەمەس تاۋارلاردىڭ ىشىندە ناۋرىزدا باعانىڭ ەڭ كوپ ءوسۋى جيھاز جانە ۇيگە قاجەتتى زاتتارعا - 2,3 پايىز، جەكە قولدانىلاتىن تاۋارلارعا 1,3 پايىز بايقالدى.

ماسەلەن، وتكەن ايمەن سالىستىرعاندا ەلەكتر اسپالى شامى - 4,3 پايىز، كىلەم - 2,5 پايىز، ديۆان-توسەك - 2,4 پايىز، ورىندىق 2,2 پايىز ءوستى.

جەكە قولدانىلاتىن تاۋارلار ىشىندە دەزودورانت - 2,5 پايىز، دارەتحانا قاعازى - 1,9 پايىز، ءيىس سابىن - 1,7 پايىز، ءتىس شەتكاسى - 1,5 پايىز، شاشقا ارنالعان بوياۋ 1,3 پايىز قىمباتتادى.

قىزمەت كورسەتۋ بويىنشا باعالاردىڭ ءوسۋى دەنساۋلىق ساقتاۋ قىزمەتتەرىنە 1,7 پايىز بولدى.

ستوماتولوگيالىق قىزمەتتەر - 1,8 پايىز، مەديتسينالىق زەرتحانالار قىزمەتتەرى 1,1 پايىز قىمباتتاعان.

باعانىڭ جوعارىلاۋى جولاۋشىلار تەمىر جول كولىگى قىزمەتتەرىنە - 3,7 پايىز، شاشتاراز بەن سۇلۋلىق سالوندارىنا - 2,5 پايىز، ءۇي جوندەۋ جانە قىزمەت كورسەتۋگە 0,7 پايىز تىركەلگەن.

وڭىرلەر اراسىندا ەڭ جوعارى ايلىق ينفلياتسيا الماتى وبلىسىندا - 1,5 پايىز (ورتاشا رەسپۋبليكالىق دەڭگەيدەن 0,6 پ. ت. جوعارى)، ەڭ تومەنگى - استانا قالاسىندا 0,4 پايىز تىركەلدى.

وڭىرلەر بويىنشا ازىق- تۇلىك تاۋارلارىنا ەڭ جوعارى باعا الماتى وبلىسىندا - 2,2 پايىز، ازىق-تۇلىك ەمەس تاۋارلار - ماڭعىستاۋ جانە قاراعاندى وبلىستارىندا 1,1 پايىزدان، اقىلى قىزمەتتەر تۇركىستان وبلىسىندا 2,0 پايىز ءوستى.

2023-جىلعى ناۋرىزدا جىلدىق ماندە ينفلياتسيا دەڭگەيى 18,1 پايىزدى قۇرادى. ازىق-تۇلىك تاۋارلارىنىڭ باعاسى 20,5 پايىز، ازىق-تۇلىككە جاتپايتىن تاۋارلار 18,1 پايىز، اقىلى قىزمەتتەر 14,4 پايىزعا ءوستى.

2022-جىلعى ناۋرىزبەن سالىستىرعاندا شاقپاق قانت - 77 پايىز، كىر سابىن - 73,3 پايىز، كەڭسە تاۋارلارى - 72,8 پايىز، بالالار سابىنى - 55,6 پايىز، باستى پياز - 55,1 پايىز، ىدىستى جۋۋعا ارنالعان قۇرالدار - 53,9 پايىز، كەپتىرىلگەن ورىك - 53,6 پايىز، دارەتحانا قاعازى 49,5 پايىز قىمباتتادى.

كەرىسىنشە، جىلدىق ماندە قىرىققابات 51,1 پايىز ارزاندادى.