قازاقستاندا 180 مىڭ ادام قاتەرلى ىسىككە شالدىققان
رەسمي اقپاراتتارعا سۇيەنسەك، 2018-جىلى اتى جامان اۋرۋدان 14 مىڭنان استام ادام قايتىس بولعان. وبىر دەرتىنەن شىعىس قازاقستان، قاراعاندى وبلىستارىندا جانە الماتى قالاسىندا ەڭ كوپ ناۋقاس كوز جۇمدى.
سولتۇستىك قازاقستان وبلىسىنىڭ ونكولوگيالىق ديسپانسەرىندە قازىر 10 مىڭعا جۋىق سىرقات تىركەۋدە تۇر. مامانداردىڭ ايتۋىنشا، بىلتىر 619 ادام قايتىس بولسا، ونىڭ ەكەۋى 14 جاسقا تولماعان بالالار.
«بۇگىندە تەكسەرىلۋگە كەلەتىن ادامداردىڭ سانى ارتقان. وسىعان وراي قاتەرلى ىسىككە شالدىققاندار سانى وتكەن جىلمەن سالىستىرعاندا جوعارى. بۇل قۋانتارلىق جاعداي، ويتكەنى ءوز ومىرىنە بەيجاي قارامايتىندار كوبەيگەن. ەرتە ساتىسىندا انىقتاساق، ءبىز اۋرۋدىڭ الدىن الا الامىز. قازىر ول ءۇشىن ەمحانادا بار جاعداي جاسالعان»، - دەيدى س ق و ونكولوگيالىق ديسپانسەرى باس دارىگەرىنىڭ ورىنباسارى ولەگ دۋدياك.
بيىل ەل قازىناسىنان پروفيلاكتيكالىق سكرينينگتەردى وتكىزۋگە 4,3 ميلليارد تەڭگە ءبولىندى.