بيىل سەناتتىڭ 17 دەپۋتاتى سايلانادى

نۇر- سۇلتان. قازاقپارات – ق ر ورتالىق سايلاۋ كوميسسياسىنىڭ سەنات دەپۋتاتتارىنىڭ سايلاۋىنا بايلانىستى وتىرىسى ونلاين رەجيمدە ءوتىپ جاتىر، دەپ حابارلايدى قازاقپارات ءتىلشىسى.

«بۇگىن ق ر پرەزيدەنتىنىڭ قازاقستان رەسپۋبليكاسى پارلامەنتى سەناتى دەپۋتاتتارىنىڭ كەزەكتى سايلاۋىن تاعايىنداۋ تۋرالى قاۋلىسى جاريالاندى. ق ر كونستيتۋتسياسىنا سايكەس، سەنات كونستيتۋتسيالىق زاڭدا بەلگىلەنگەن تارتىپپەن ءار وبلىستان، رەسپۋبليكالىق ماڭىزى بار قالادان جانە ق ر استاناسىنان 2 ادام وكىلدىك ەتەتىن دەپۋتاتتاردان قۇرالادى. سايلانعان سەنات دەپۋتاتتارىنىڭ جارتىسى ءار ءۇش جىل سايىن قايتا سايلانادى»، - دەدى وتىرىستى اشقان ق ر و س ك ءتوراعاسى بەرىك يماشيەۆ.

ونىڭ اتاپ وتۋىنشە، وسى جىلدىڭ قازان ايىندا 2014 -جىلى سايلانعان سەناتتىڭ 17 دەپۋتاتىنىڭ وكىلەتتىك مەرزىمى اياقتالادى. «سەنات دەپۋتاتتارىن جاناما سايلاۋ قۇقىعى نەگىزىندە جاسىرىن داۋىس بەرۋ ارقىلى تاڭداۋشىلار - ءماسليحات دەپۋتاتتارى سايلايدى. ولاردى ءوز كەزەگىندە رەسپۋبليكا ازاماتتارى سايلادى. وسىلايشا، ەل ازاماتتارى ءوز وكىلدەرى ارقىلى سەناتتى قالىپتاستىرۋعا قاتىسادى»، - دەدى ول.

قازىرگى ۋاقىتتا وتىرىستا 2020 -جىلدىڭ 12 - تامىزىنا تاعايىندالعان پارلامەنت سەناتى دەپۋتتارىن سايلاۋعا دايىندىق جانە ونى وتكىزۋ ماسەلەلەرى قارالىپ جاتىر.

اۆتور: مارلان جيەمباي