ەلىمىزدە جاڭارتىلاتىن ەنەرگيا كوزدەرىنىڭ ۇلەسى 15 پايىزعا دەيىن ارتادى
استانا. قازاقپارات - استانادا پرەمەر-مينيستر ءاليحان سمايىلوۆتىڭ توراعالىعىمەن ورتالىق مەملەكەتتىك ورگانداردىڭ باسشىلارى جانە ديپلوماتيالىق كورپۋس وكىلدەرىنىڭ قاتىسۋىمەن «قازاقستان- ەۋرووداق» ديالوگ پلاتفورماسىنىڭ 12-وتىرىسى ءوتتى، دەپ حابارلايدى قازاقپارات.
ەۋروپالىق وداقپەن ارىپتەستىكتى كەڭەيتۋ - قازاقستاننىڭ باسىمدىقتارىنىڭ ءبىرى. رەسپۋبليكا ساۋدا- ەكونوميكالىق جانە ينۆەستيتسيالىق ىنتىماقتاستىقتى ودان ءارى تەرەڭدەتۋ ءۇشىن قولدا بار مۇمكىندىكتەردى پايدالانۋعا مۇددەلى. اتاپ ايتقاندا، مۇنداعى پەرسپەكتيۆالىق باعىتتار - «جاسىل ەكونوميكاعا» كوشۋ جانە ءوزارا كولىكتىك بايلانىستى نىعايتۋ.
ەكولوگيالىق كۇن ءتارتىبى - قازاقستان ەكونوميكاسىنىڭ ورنىقتى دامۋىندا نەگىزگى باسىمدىقتاردىڭ ءبىرى. ماسەلەن، 2030 -جىلعا قاراي ەلىمىز ءوزىنىڭ ەنەرگيا تەڭگەرىمىندەگى جاڭارتىلاتىن ەنەرگيا كوزدەرىنىڭ ۇلەسىن اعىمداعى 4,5 پايىزدان 15 پايىزعا دەيىن ارتتىرۋدى جوسپارلاپ وتىر. پرەمەر- مينيستر سونداي-اق ترانزيتتىك-كولىك ىنتىماقتاستىعى سالاسىندا ترانسكاسپي حالىقارالىق كولىك باعىتىنىڭ (ت ح ك ب) ءرولى ارتىپ كەلە جاتقانىن اتاپ ءوتتى.
بۇگىندە قازاقستان مارشرۋتتىڭ باسقا قاتىسۋشىلارىمەن بىرلەسىپ ورتا دالىزدەگى «تار جەرلەردى» سينحروندى جويۋ بويىنشا بەلسەندى جۇمىس جۇرگىزىپ وتىر. سونىمەن قاتار رەسپۋبليكا ورتا ءدالىزدى ترانسەۋروپالىق كولىك جەلىسىمەن جانە Global Gateway باستاماسىمەن ۇشتاستىرۋ بويىنشا ەۋروپالىق سەرىكتەستەرمەن بىرلەسىپ جۇمىس ىستەۋگە دايىن.
«جالپى قازاقستان مەن ەۋرووداقتىڭ «جاسىل» ەكونوميكا، كولىك جانە لوگيستيكا سالالارىنداعى ارىپتەستىكتى ودان ءارى تەرەڭدەتۋ بويىنشا مۇمكىندىكتەرى كوپ»، - دەدى ءاليحان سمايىلوۆ.
سونىمەن قاتار ۇكىمەت باسشىسى ەۋروپالىق ارىپتەستەرىنە ازەربايجان مەن گرۋزياعا رەسمي ساپارى اياسىندا كەلىسىلگەن ت ح ك ب-نى دامىتۋ جونىندەگى ۋاعدالاستىقتار مەن قول قويىلعان كەلىسىمدەر تۋرالى ەگجەي-تەگجەيلى ايتىپ بەردى. ە و-نىڭ قازاقستانداعى ەلشىسى كەستۋتيس يانكاۋسكاس ەۋرووداق پەن قازاقستان اراسىنداعى قارىم-قاتىناس جاقسى قارقىنمەن دامىپ كەلە جاتقانىن، بۇل رەتتە جاڭارتىلاتىن ەنەرگيا كوزدەرى سالاسىنداعى جاڭا جوبالاردى ىسكە اسىرۋ جانە ءوزارا كولىك بايلانىسىن نىعايتۋ الداعى بىرلەسكەن جۇمىستىڭ نەگىزگى باعىتتارىنىڭ ءبىرى ەكەنىن اتاپ ءوتتى.
