ۇلتتىق بانك بازالىق مولشەرلەمەنى 14,5 پايىزعا دەيىن كوتەردى
تيىسىنشە، وتىمدىلىكتى ۇسىنۋ جونىندەگى تۇراقتى قولجەتىمدى وپەراتسيالار بويىنشا مولشەرلەمە - 15,5 پايىز، ال وتىمدىلىكتى الۋ جونىندەگى تۇراقتى قولجەتىمدى وپەراتسيالار بويىنشا مولشەرلەمە 13,5 پايىز بولادى.
قارجىلىق ۇيىمنىڭ مالىمەتىنشە، ناقتى ينفلياتسيا ينفلياتسيالىق كۇتۋلەردىڭ جەدەلدەۋى اياسىندا بولجامدى كورسەتكىشتەن ەداۋىر اسىپ ءتۇستى. تۇتىنۋشىلىق باعالاردىڭ ورنىقتى قۇرامداس بولىكتەرى، سول سياقتى باعانىڭ جالپى دەڭگەيى ءوسىپ كەلەدى.
بيىلعى مامىردا جانە ماۋسىمدا قالىپتاسقان ينفلياتسيا شارىقتاۋ شەگىنەن وتپەگەنىن كورسەتەدى.
جوعارى ينفلياتسيالىق كۇتۋلەر پروينفلياتسيالىق قىسىمدى كۇشەيتۋدە. ۇلتتىق بانكتىڭ باعالاۋىنا سايكەس، 2022-جىلدىڭ قورىتىندىسى بويىنشا ينفلياتسيا بۇرىنعى بولجامنان اسىپ تۇسەدى. جاڭا كۇتپەگەن وزگەرىستەر ورىن الماعان جاعدايدا ينفلياتسيانىڭ جىلدىق ءوسۋى 2023-جىلدىڭ ءبىرىنشى توقسانىنا دەيىن جالعاسىپ، ودان ءارى باياۋلايدى.
بۇل شەشىم 2023-جىلى ينفلياتسيالىق پروتسەستەر مەن كۇتۋلەردى تۇراقتاندىرىپ، باياۋلاتۋعا جانە ينفلياتسيانى ورتا مەرزىمدى پەرسپەكتيۆادا نىسانالى كورسەتكىشكە جاقىنداتۋعا باعىتتالعان.
قالىپتاسقان ينفلياتسيالىق پروتسەستەردىڭ ورنىقتىلىعى، سۇرانىستى فيسكالدىق ىنتالاندىرۋ جانە سىرتقى پروينفلياتسيالىق احۋال حالىقتىڭ قاراجات جيناقتاۋ نيەتىن ىنتالاندىرۋ ءۇشىن ۇزاق ۋاقىت بويى بازالىق مولشەرلەمەنى قازىرگى دەڭگەيدە ۇستاپ تۇرۋدى تالاپ ەتەدى، بۇل كەلەسى جىل ىشىندە ينفلياتسياعا بىرتىندەپ اسەر ەتەتىن بولادى.
2022-جىلعى ماۋسىمدا جىلدىق ينفلياتسيا 14,5 پايىزعا دەيىن جەدەلدەدى.
بارلىق قۇرامداس بولىكتەر بويىنشا باعا ءوسىپ كەلەدى - ازىق-تۇلىك تاۋارلارى (19,2 پايىز)، ازىق-تۇلىككە جاتپايتىن تاۋارلار (13,2 پايىز) جانە اقىلى قىزمەتتەر (9,2 پايىز). بۇل جەتكىزۋ تىزبەگىندەگى ىركىلىستەرگە، سىرتقى ينفلياتسيالىق قىسىمنىڭ كۇشەيۋىنە بايلانىستى شىعاسىلار ينفلياتسياسىنىڭ ءوسۋى، سونداي-اق فيسكالدىق ىنتالاندىرۋدان قولداۋ تاپقان جوعارى سۇرانىس پەن تەڭگە باعامىنىڭ السىرەۋىنەن تۋىنداپ وتىر.
بازالىق ينفلياتسيا جالپى ينفلياتسيادان وزىپ، باعانىڭ ورنىقتى ءوسۋ فاكتورلارىنىڭ باسىمدىعىن كورسەتە وتىرىپ، قايتادان ۇدەي باستادى. ينفلياتسيالىق كۇتۋلەر دە ۇدەگەنىن كورسەتتى - 2022-جىلعى ماۋسىمدا كۇتىلەتىن ينفلياتسيانىڭ مەديانالىق باعاسى ءبىر جىل ىشىندە 14,9 پايىزعا دەيىن (مامىردا - 13,8 پايىز) ءوستى.
مامىر-ماۋسىمدا ناقتى ينفلياتسيانىڭ جانە ينفلياتسيالىق كۇتۋلەردىڭ نەعۇرلىم جوعارى دەڭگەيدە قالىپتاسۋىن ەسكەرە وتىرىپ، ۇلتتىق بانك 2022-جىلى جىلدىق ينفلياتسيانىڭ بۇرىن ايتىلعان 13-15 پايىز بولجامىنىڭ جوعارعى شەگىنەن دە جوعارى جەدەلدەۋىن كۇتەدى.
جاڭا باعالاۋ كەلەسى بولجامدى راۋند اياسىندا جۇرگىزىلەدى. 2022-جىلدىڭ ءبىرىنشى جارتىجىلدىعىندا ەكونوميكا 3,4 پايىزعا ءوستى، بۇل جالپى ۇلتتىق بانكتىڭ بولجامدارىنا 2022-جىلدىڭ سوڭىنا دەيىن 2,8-3,8 پايىز دەڭگەيىندە سايكەس كەلەدى. ەكونوميكانىڭ بارلىق نەگىزگى سالالارى وسۋدە، ءبىراق كەيبىر سالالاردا ىركىلىس بار. ماسەلەن، قاشاعان كەن ورنىنداعى جوندەۋ جۇمىستارىنا بايلانىستى تاۋ-كەن ونەركاسىبىنىڭ ءوسىمى باياۋلادى.
سونىمەن بىرگە، ينفلياتسيالىق پروتسەستەردىڭ جەدەلدەۋىنە قاراماستان، ساۋدا كورسەتكىشتەرى تۇراقتى سۇرانىستى كورسەتەدى. جيىنتىق سۇرانىس جىلدىق ءوسۋى جەدەلدەگەن جانە ماۋسىمدا 18,7 پايىزدى قۇراعان ەلەۋلى مەملەكەتتىك شىعىستارمەن ىنتالاندىرىلۋدا.
بۇل ماڭىزدى پروينفلياتسيالىق فاكتور سانالادى جانە مونەتارلىق جاعدايلاردى تيىسىنشە رەتتەۋدى تالاپ ەتەدى.
الەمدىك ەكونوميكانىڭ ءوسۋى بويىنشا بولجام تومەندەۋ جاعىنا قاراي قايتا قارالدى.
دۇنيەجۇزىلىك بانك 2022-جىلى جاھاندىق ەكونوميكانىڭ بولجامدى ءوسىمىن 4,1 پايىزدان 2,9 پايىزعا دەيىن تومەندەتتى.
قازاقستاننىڭ ساۋدا ارىپتەسى سانالاتىن ەلدەر بويىنشا ءوسۋ بولجامى دا: رەسەي بويىنشا 2,4 پايىزدان مينۋس 8,9 پايىزعا دەيىن، ە و بويىنشا 4,2 پايىزدان 2,5 پايىزعا دەيىن، قىتاي بويىنشا 5,1 پايىزدان 4,3 پايىزعا دەيىن تومەندەدى.
گەوساياسي قاقتىعىس، قىتايداعى كارانتيننىڭ ىقتيمال كۇشەيۋى، جەتكىزىلىم تىزبەگىندەگى ىركىلىستەردىڭ سالدارىنان الەمدىك ەكونوميكادا ءالسىز دامۋ تاۋەكەلى ساقتالىپ وتىر. 2022-جىلعى شىلدەنىڭ باسىندا ورىن العان ءبىراز قىسىمنان كەيىن مۇناي باعاسىنىڭ ءوسۋى قايتا قالپىنا كەلدى.
ا ق ش دوللارىنىڭ ەڭ جوعارى ماندەردەن ءبىرشاما السىرەۋى جانە مۇناي قورىنىڭ شەكتەۋلى بولۋى مۇناي باعاسىن ۇستاپ تۇر.
EIA باعالاۋىنا سايكەس، الەمدىك ەكونوميكانىڭ ءوسۋ پەرسپەكتيۆالارىنىڭ ناشارلاۋىن ەسكەرە وتىرىپ، 2022-جىلدىڭ 3-توقسانىندا Brent باعاسى ورتا ەسەپپەن 104 ا ق ش دوللارىن، جىل سوڭىنا قاراي - باررەلىنە 95 ا ق ش دوللارىن، 2023-جىلى - باررەلىنە 90 دوللاردان جوعارى كورسەتكىشتى قۇرايدى. الەمدە جوعارى ينفلياتسيالىق احۋال ساقتالىپ، سىرتقى مونەتارلىق جاعدايلار كۇشەيە باستادى.
ف ا و ازىق-تۇلىك باعالارىنىڭ يندەكسى ماۋسىمدا، نەگىزىنەن، وسىمدىك مايلارى، ءداندى داقىلدار مەن قانت ەسەبىنەن 2,3 پايىزعا تومەندەدى، ءبىراق ءالى دە وتكەن جىلعى كورسەتكىشتەن 23,1 پايىزعا جوعارى شىعىپ، تاريحي ەڭ جوعارى كورسەتكىشتەرگە جۋىقتادى.
2022-جىلعى ماۋسىمدا ەنەرگيا تاسىمالداۋشىلار مەن ازىق-تۇلىك باعاسىنىڭ وسۋىنە بايلانىستى ا ق ش پەن ە و- داعى جىلدىق ينفلياتسيا، تيىسىنشە، 9,1 پايىز جانە 9,6 پايىز بولىپ، تاريحي ەڭ جوعارى كورسەتكىشتەرگە جەتتى.
جوعارى ينفلياتسيالىق قىسىم جاعدايىندا ا ق ش ف ر ج 2022-جىلعى ماۋسىمدا مولشەرلەمەنى جىلدىق 1,5 پايىز-1,75 پايىزعا دەيىن بىردەن 0,75 پ. ت. (1994-جىلدان باستاپ العاش رەت) كوتەردى، ەندى بيىل جانە كەلەسى جىلدارى مولشەرلەمەنى ودان ءارى كوتەرەتىنى تۋرالى بەلگى بەرە باستادى.
ءوز كەزەگىندە، ە و ب 11 جىل ىشىندە العاش رەت پايىزدىق مولشەرلەمەنى 0,5 پ. ت. ارتتىردى.
رەتتەۋشى الداعى ايلاردا مولشەرلەمەنىڭ ودان ءارى ءوسۋ ىقتيمالدىعى تۋرالى دا حابارلادى.
بازالىق مولشەرلەمە بويىنشا كەلەسى شەشىم جازعى بولجامدى راۋندتىڭ جانە ماكروەكونوميكالىق كورسەتكىشتەردىڭ جاڭارتىلعان بولجامدى كورسەتكىشتەرىنىڭ، سىرتقى ورتاداعى جانە ىشكى ەكونوميكاداعى تاۋەكەلدەر تەڭگەرىمىنىڭ قورىتىندىسى بويىنشا قابىلدانادى.
ۇلتتىق بانكى اقشا-كرەديت ساياساتى كوميتەتىنىڭ بازالىق مولشەرلەمە بويىنشا كەزەكتى جوسپارلى شەشىمى 2022-جىلى 5- قىركۇيەكتە ساعات 14:00 دە جاريالانادى. سول كۇنى نۇر-سۇلتان ۋاقىتىمەن ساعات 16:00 دە باسپا ءسوز بريفينگى وتكىزىلەدى.
