قازاقستاندا 13-اقپاننان باستاپ جۇرگىزۋشى كۋالىگىن كورسەتپەي كولىك جۇرگىزۋگە بولادى
«مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول ءجۇرىسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.
2019-جىلعى جەلتوقساندا ەل پرەزيدەنتى قاسىم-جومارت كەمەل ۇلى توقايەۆ جۇرگىزۋشى قۇجاتتارىن اقپاراتتىق جۇيەلەر ارقىلى تەكسەرۋ، جۇرگىزۋشىلەرگە قۇجاتتاردىڭ قاعاز نۇسقالارىن وزىمەن بىرگە الىپ جۇرمەۋگە مۇمكىندىك بەرۋ تۋرالى ماسەلەنى كوتەرىپ، ءى ءى م- نە زاڭنامالىق اكتىلەرگە وزگەرىستەر مەن تولىقتىرۋلار ەنگىزۋدى تاپسىردى. جاڭا زاڭ 13- اقپاننان باستاپ كۇشىنە ەنەدى»، - دەپ جازدى مينيستر جەلىدەگى پاراقشاسىندا.
بۇرىن قازاقستاندا جۇرگىزۋشى قۇجاتتارىنىڭ ءبىرىنىڭ جوقتىعى ءۇشىن ەسكەرتۋ (ەگەر العاش رەت بولسا) نەمەسە 5 ا ە ك ايىپپۇل قاراستىرىلعان بولاتىن. ەندى جۇرگىزۋشىلەرگە كولىكتى جۇرگىزگەن كەزدە وزىمەن بىرگە تەك ءبىر عانا قۇجات - جەكە باسىن كۋالاندىراتىن كۋالىكتى الىپ ءجۇرۋ جەتكىلىكتى.
«قازاقستاندا بەرىلگەن جۇرگىزۋشى كۋالىگىن، كولىك قۇرالىن تىركەۋ كۋالىگىن، ساقتاندىرۋ پوليسىن، سونداي-اق تەحنيكالىق بايقاۋدان وتكەنىن راستايتىن قۇجاتتى پوليتسەي پلانشەت ارقىلى تەكسەرەدى. ال ينتەرنەت جەلىسىنە قولجەتىمدىلىك جوق ەلدى مەكەندەردە جانە تاس جولداردا تەكسەرۋ راديوبايلانىس ارنالارى ارقىلى جۇزەگە اسىرىلاتىن بولادى. جاڭا نورمالاردىڭ قازاقستاندىق جۇرگىزۋشى كۋالىگى جوق شەتەلدىكتەرگە جانە قازاقستاندا تىركەلمەگەن كولىك باسقارۋشىلارىنا قاتىسى جوق. اۆتوكولىكتى جۇرگىزۋشى قۇجاتتارىنسىز باسقارۋدىڭ وسىنداي مۇمكىندىگى گرۋزيا، ۋكراينا، پولشا، لاتۆيا، ليتۆا سياقتى مەملەكەتتەردە بار، ول ەلدەردە دە ۇلتتىق زاڭناماعا ءتيىستى وزگەرىستەر ەنگىزىلگەن. مەملەكەت كولىكتى باسقارۋدى ەداۋىر جەڭىلدەتتى، ءبىراق جۇرگىزۋشىلەر باسقا جول قوزعالىسىنا قاتىسۋشىلاردىڭ قاۋىپسىزدىگى ءۇشىن جاۋاپكەرشىلىكتى ەستە ۇستاۋى كەرەك»، - دەيدى ول.
ەسكە سالا كەتسەك اتالمىش زاڭعا مەملەكەت باسشىسى 1- اقپاندا قول قويعان بولاتىن.