قازاقستاندا 12- قاڭتاردان باستاپ شەتەلدىك كولىكتى ساقتاندىرۋعا تىيىم سالىنادى

بۇل تۋرالى قازاقپارات Kolesa.kz سايتىنا سىلتەمە جاساپ حابارلايدى.

«ەندى ەل تۇرعىندارى باسقا مەملەكەتتە تىركەلگەن اۆتوموبيلدى ساقتاندىرۋ پوليسى ارقىلى جۇرگىزە المايدى. ءبىراق 12- قاڭتارعا دەيىن راسىمدەلگەن پوليستەر مەرزىمى اياقتالعانشا جارامدى بولادى.

پرەزيدەنت قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەنەتىن وزگەرىستەر مەن تولىقتىرۋلار تۋرالى زاڭعا قول قويدى. ول بيىل 12- قاڭتاردا كۇشىنە ەنەدى. ونىڭ ىشىندە كولىك يەلەرىن مىندەتتى ساقتاندىرۋ جانە «جول ءجۇرىسى تۋرالى» زاڭدارعا ەنگەن وزگەرىستەر دە بار»، - دەپ جازادى پورتال.

وسىلايشا، 12- قاڭتاردان باستاپ ساقتاندىرۋ تۋرالى زاڭنىڭ 10-بابى 5.2-بولىممەن تولىقپاق.

««جول ءجۇرىسى تۋرالى» زاڭعا دا وزگەرىس ەنىپ، ول بويىنشا شەتەل ازاماتى نەمەسە ءبىزدىڭ ەلدە ازاماتتىعى جوق كىسى جۇرگىزەتىن، قازاقستاننان تىس جەردە تۇراتىن تۇلعاعا تيەسىلى، ەلىمىزدە تىركەلمەگەن جانە ۋاقىتشا كىرگەن اۆتوموبيل حالىقارالىق قوزعالىستاعى كولىك دەپ تانىلاتىن بولادى.

مۇنداي ماشينا ءبىر جىلعا دەيىن ءبىزدىڭ ەلدە ەركىن جۇرە الادى، ودان كەيىن 30 كۇنگە ەلدەن شىعارىلىپ، قايتا كىرگىزۋگە بولادى»، - دەپ جازىلعان اتالمىش باپتا.

ءسويتىپ، 2023-جىلدىڭ 12- قاڭتارىنان باستاپ ساقتاندىرۋ پوليسىن الۋ ءۇشىن ماشينا قازاقستاندا ەسەپتە تۇرۋعا نەمەسە شەتەلدىكتىڭ، نە ازاماتتىعى جوق تۇلعانىڭ مەنشىگىندە بولۋعا ءتيىس. قازاقستان ازاماتتارى بوتەن ەلدە تىركەلگەن ماشينانى ساقتاندىرا المايدى. ياعني، قازاقستاننىڭ وزگە ازاماتىنا ساقتاندىرۋ ارقىلى ساتا دا المايدى.

ال ترانزيتتىك ءنومىر تاققان كولىكتەردى بۇرىنعىداي 10 كۇنگە دەيىن ساقتاندىرۋ جالعاسادى.