ۇلتتىق بانك بازالىق مولشەرلەمەنى 12 پايىز دەڭگەيىنە كوتەردى
نۇر-سۇلتان. قازاقپارات - قازاقستان رەسپۋبليكاسىنىڭ ۇلتتىق بانكى سىرتقى سەكتور تاراپىنان تاۋەكەلدەرگە تەرىس ىقپال ەتۋ اياسىندا باعا تۇراقتىلىعىن قولداۋ قاجەتتىلىگىنە نەگىزدەلگەن بازالىق مولشەرلەمەنىڭ دەڭگەيى بويىنشا كەزەكتەن تىس شەشىم قابىلدادى، دەپ حابارلايدى قازاقپارات ءتىلشىسى.
ۇ ب مالىمەتىنشە، بۇگىن، 10 - ناۋرىزدان باستاپ، بازالىق مولشەرلەمە پايىزدىق ءدالىزدى +/- 1,5 پايىزدىق تارماققا دەيىن كەڭەيتىلىپ، جىلدىق 12 پايىز دەڭگەيىندە بەلگىلەنەدى. تيىسىنشە، وتىمدىلىكتى ۇسىنۋ بويىنشا تۇراقتى قولجەتكىزۋ وپەراتسيالارى بويىنشا مولشەرلەمە 13,5 جانە وتىمدىلىكتى الۋ بويىنشا تۇراقتى قولجەتكىزۋ وپەراتسيالارى بويىنشا 10,5 پايىز بولادى.
«بازالىق مولشەرلەمەنى ارتتىرۋ تۋرالى شەشىم الەمدىك ەكونوميكاداعى احۋالدىڭ كۇرت وزگەرۋىنە قاراي قابىلداندى. COVID-19 كورونوۆيرۋسىنىڭ تارالۋ اۋقىمىنىڭ ايتارلىقتاي كەڭەيۋى قازاقستاندىق ەكسپورتتى نەگىزگى تۇتىنۋشى قىتاي جانە ەۋروپالىق وداق سياقتى ەلدەردىڭ ەكونوميكالىق دامۋ پەرسپەكتيۆالارىنىڭ ناشارلاۋىنداعى نەگىزگى فاكتورعا اينالدى. Brent سۇرىپتى مۇناي باعاسى 2020-جىلعى 9 - ناۋرىزدا وپەك+ وتىرىسىنا قاتىسۋشىلاردىڭ مۇناي ءوندىرۋدى قىسقارتۋ بويىنشا مامىلەنىڭ تالاپتارى تۋرالى ۋاعدالاستىققا كەلە الماۋى ناتيجەسىندە كۇرت تومەندەدى. ونىڭ بەلگىلەنگەن باعاسى ءبىر كۇندە 30 پايىزدان اسا بارىنشا كوپ تومەندەپ، ءبىر باررەل ءۇشىن 31-36,5 ا ق ش دوللارى دەڭگەيىندە بولدى»، - دەپ اتاپ وتەدى ۇلتتىق بانكتەن.
بازالىق مولشەرلەمە بويىنشا قازاقستان رەسپۋبليكاسى ۇلتتىق بانكىنىڭ كەزەكتى شەشىمى 2020-جىلعى 16 - ناۋرىزدا نۇر-سۇلتان قالاسىنىڭ ۋاقىتىمەن ساعات 15:00 دە جاريالانادى.
