ك. ءماسىموۆ 11- ەۋروپا جانە ازيا ەلدەرىنىڭ سامميتىنە قاتىسادى
ۇلان- باتىر قالاسىنا بارار جولدا ق ر پرەزيدەنتى نۇرسۇلتان نازاربايەۆتىڭ تاپسىرماسىمەن ك. ءماسىموۆ ولگەي قالاسىنا بارىپ، ءبىرقاتار كەزدەسۋلەر وتكىزەدى.
ساپار بارىسىندا قازاق دياسپوراسىمەن كەزدەسۋ، مۇراجاي مەن دراما تەاترىنا بارۋ جوسپارلانعان. سونىمەن قاتار ولگەي قالاسىنداعى ورتا مەكتەپكە بارۋ كوزدەلگەن.
ولگەي قالاسى ورنالاسقان وبلىس حالقىنىڭ باسىم بولىگىن قازاق دياسپوراسى قۇرايتىنىن اتاپ وتكەن ءجون. مۇندا بارلىعى 90 مىڭ ادام تۇرسا، ونىڭ %88,7 بولىگىن قازاقتار قۇرايدى.
اسەم (Asia - Europe Meeting, ASEM) - اشىق، رەسمي ەمەس، ايماقارالىق ديالوگتىك ۇدەرىس بولىپ تابىلادى، ونىڭ اياسىندا قاتىسۋشى ەلدەردىڭ ساياسات پەن قاۋىپسىزدىك، قارجى- ەكونوميكالىق جانە الەۋمەتتىك- مادەني سالالارداعى ىنتىماقتاستىعى جۇزەگە اسىرىلادى.
فورۋمنىڭ كۇن تارتىبىندە جاھاندىق قارجىلىق- ەكونوميكالىق داعدارىس سالدارىن جەڭۋ، قازىرگى جانە جاڭا قاۋىپ- قاتەرلەرگە قارسى ارەكەتتەر، جاپپاي قىرىپ- جويۋ قارۋلارىن تاراتپاۋ، ەنەرگيالىق قاۋىپسىزدىكتى قامتاماسىز ەتۋ، تۇراقتى دامۋ، كليماتتىڭ وزگەرۋى، ەكولوگيا، مادەني بايلانىستاردى ىلگەرلەتۋ جانە ت. ب. باعىتتار قامتىلعان.
قازىرگى كەزدە اسەم قۇرامىنا 53 مەملەكەت كىرەدى.