قاڭتار- قازاندا سىرتقى ساۋدا اينالىمى 111 ميلليارد دوللاردى قۇرادى - ۇكىمەت

«حالىقارالىق وندىرىستىك- كولىكتىك جانە لوگيستيكالىق بايلانىستاردىڭ بۇزىلۋى جاھاندىق ەكونوميكاعا كەرى اسەرىن تيگىزىپ وتىر. كوپتەگەن ەلدە ينفلياتسيانىڭ رەكوردتىق كورسەتكىشى قالىپتاسۋدا. الەمدىك ەكونوميكا ءوسىمى باياۋلاپ كەلەدى. قازاقستاندا قاڭتار- قاراشادا ەكونوميكانىڭ ءوسۋ قارقىنى 2,7 پايىز دەڭگەيىندە بولدى. اۋىل شارۋاشىلىعى، اقپارات جانە بايلانىس، قۇرىلىس، وڭدەۋ ونەركاسىبى، ساۋدا، كولىك جانە قويمالاۋ سالالارى 4 پايىزدان استام ءوسىم كورسەتۋدە. ەكونوميكا ءوسىمىنىڭ باياۋلاۋى مۇناي جانە تاۋ- كەن وندىرىستەرىندەگى باياۋلاۋمەن بايلانىستى. وسى جىلدىڭ قاڭتار- قازاندا سىرتقى ساۋدا اينالىمى 34 پايىزعا ءوسىپ، 111 ميلليارد دوللاردى قۇرادى. ەكسپورت 45 پايىزعا، سونىڭ ىشىندە وڭدەلگەن تاۋارلار ەكسپورتى 35 پايىزعا ءوستى. وڭ ساۋدا بالانسى 2 ەسەگە ۇلعايىپ، 31 ميلليارد دوللاردى قۇرادى»، - دەدى ۇكىمەت باسشىسى.

ونىڭ اتاپ وتۋىنشە، نەگىزگى كاپيتالعا سالىنعان ينۆەستيتسيا كولەمى 6,6 پايىزعا ارتتى. ەكونوميكانىڭ نەگىزگى سالالارى بويىنشا ينۆەستيتسيالار اعىنى ءبىلىم بەرۋ سالاسىندا، ساۋدادا، كولىك جانە قۇرىلىستا، لوگيستيكادا، اۋىل شارۋاشىلىعىندا، ونەركاسىپتە ەداۋىر ءوستى.

«ينفلياتسيا جىلدىق كورىنىستە قاراشادا 19,6 پايىزدى قۇرادى. ونىڭ نەگىزگى فاكتورلارى - گەوساياسي شيەلەنىستىڭ كۇشەيۋى، الەمدەگى باعانىڭ رەكوردتىق ءوسۋى، رەسەي رۋبلىنىڭ نىعايۋى، لوگيستيكانىڭ بۇزىلۋى جانە كورشى ەلدەردە كەيبىر تاۋارلاردىڭ ەكسپورتىنا ۋاقىتشا شەكتەۋلەردىڭ ەنگىزىلۋى. ۇكىمەت ينفلياتسيانى باقىلاۋ جانە تومەندەتۋ بويىنشا شارالار كەشەنىن ىسكە اسىرۋدا. ونىڭ اياسىندا جەدەل جانە ورتا مەرزىمدى ءىس- شارالار كوزدەلگەن. ولار ىشكى نارىقتاعى وتاندىق تاۋارلاردىڭ ۇلەسىن ارتتىرۋعا، تاۋارلاردى ساقتاۋ جانە تاسىمالداۋ تەتىكتەرىن دامىتۋعا، باعا بەلگىلەۋدى باقىلاۋعا، مونوپولياعا قارسى جانە سىرتقى ساۋدانى رەتتەۋگە باعىتتالعان»، -دەدى ءاليحان سمايىلوۆ.

ينفلياتسيا سوڭعى 14 جىلدا بولماعان دەڭگەيگە جەتتى.

«بۇگىن ەلىمىزدىڭ بيىلعى الەۋمەتتىك- ەكونوميكالىق دامۋ كورسەتكىشتەرىنە توقتالامىز. الدا تۇرعان باستى مىندەتتەردى ايقىندايمىز. قوردالانعان ماسەلەلەر از ەمەس.

11 ايدا ەكونوميكانىڭ ءوسىمى 4,6 پايىزدان 2,7 پايىزعا دەيىن تومەندەدى. ينفلياتسيا سوڭعى 14 جىلدا بولماعان دەڭگەيگە جەتتى. قازىر بۇل كورسەتكىش - 19,6 پايىز. مۇنداي احۋال جۇرتتىڭ تابىسىنا جانە ءال- اۋقاتىنا كەرى اسەرىن تيگىزىپ وتىر»، - دەدى مەملەكەت باسشىسى.