ءبىر ءوزى 110 مىڭ ادامعا قىزمەت كورسەتىپ وتىرعان ەمحانالار بار - استانا اكىمى
قالا اكىمىنىڭ كاسىپكەرلەرىمەن كەزدەسۋىندە، مەديتسينا ساپاسىن ارتتىرۋ ءۇشىن ەمحانالاردىڭ كەيبىرىن جەكەشەلەندىرۋ تۋرالى ۇسىنىس ايتىلدى.
«بۇل ماسەلەنى ءبىرجاقتى قاراۋعا بولمايدى. ويتكەنى جەكە مەنشىك ەمحاناعا بارعىسى كەلمەيتىن سانات تا بار. مەنىڭ قولىمدا وسى سيپاتتاعى، جەكە ەمحانالار قىزمەتتەردىڭ تولىق جيىنتىعىن كورسەتپەيتىنى تۋرالى وتىنىشتەر كوپ. كەشە عانا ەمحانا سالعىسى كەلەتىن ينۆەستورلار كومپيۋتەرلىك توماگرافيا، ماگنيتتىك-رەزونانستى توماگرافيا سياقتى كۇردەلى قوندىرعىلارسىز سالۋعا تىرىسىپ جاتقانى تۋرالى ەستىدىك.
مەملەكەتتىك ەمحانالاردىڭ ءبارى دە حالىق قالاعانداي ساپالى قىزمەت كورسەتە بەرمەيدى. ولاردىڭ دەڭگەيىن ساپالى جەكە مەنشىك ەمحانالارمەن تەڭەستىرۋ قاجەتتىگى بار. سوندىقتان ءار ەمحانانىڭ ماسەلەسىن جەكە قارايمىز. جاڭا ەمحانالار سالۋ ماسەلەسى بويىنشا بۇكىل ينۆەستورلارمەن كەزدەسەمىز. سول كەزدە ورتاق شەشىم تابامىز دەپ ويلايمىن»، - دەدى جەڭىس قاسىمبەك.
سونداي-اق، كەلەشەكتە قالانىڭ قاي بولىكتەرىندە مەملەكەتتىك ەمحانالار سالىناتىنىن ايتتى.
«الدىڭعى كۇنى عانا ءبىز قالادا جەكە مەنشىك ەمحانا سالعىسى كەلەتىن ءىرى ينۆەستورلارمەن كەزدەسكەن بولاتىنبىز. كەلەسى اپتادا تاعى كەزدەسىپ، قۇرىلىس ءتۇسىپ جاتقان جاڭا اۋدانداردى قاراستىرۋ تۋرالى كەلىستىك. ەمحاناعا دەگەن سۇرانىس بار. بىزدە ءبىر ءوزى 110 مىڭ ادامعا قىزمەت كورسەتىپ وتىرعان ەمحانالار بار. قالىپتى جاعدايدا قالىپتى ەمحانالار 60-70 مىڭ ادامعا قىزمەت كورسەتۋى كەرەك. ءبىز ەمحانا سالۋ ماسەلەسىن ادىلەتتى ويلاستىرۋعا بارىنشا تىرىسامىز.
مەملەكەتتىك ەمحانالاردى تەك جەكە سەكتور، بيزنەس بارعىسى كەلمەيتىن اۋدانداردا عانا سالامىز. مىسالى، ءوندىرىس، تەمىرجول، كىرپىشتى سياقتى اۋدانداردا مەملەكەتتىك ەمحانالار سالىنادى»، - دەدى قالا اكىمى.
