ەكسپو كورمەسىنىڭ العاشقى كۇنى: تۇسكە دەيىن 10 مىڭ ادام كەلىپ ۇلگەردى
ۇيىمداستىرۋشىلاردىڭ حابارلاۋىنشا، كورمەنىڭ العاشقى كۇنى تۇسكى ۋاقىتقا دەيىن ون مىڭنان استام قوناق كەلىپ ۇلگەرگەن. قازاقپارات ءتىلشىسى ەكسپو كەشەنى اۋماعىندا ساياحات جاساپ، العاشقى كۇننىڭ قورىتىندىسىن جاسادى.
ەكسپو كورمەسى اۋماعىندا قاۋىپسىزدىككە ەرەكشە ءمان بەرىلەدى. سوندىقتان، مۇندا كەلگەن ءاربىر كەلۋشى جەكە زاتتارىن تەكسەرۋدەن وتكىزۋى ءتيىس. بۇل پروتسەسس ەداۋىر ۋاقىتتى الۋى مۇمكىن جانە كەزەكتىڭ تۋىنداۋىنا ءسوزسىز اسەر ەتەدى.
ەكسپو-2017 كورمەسىنىڭ العاشقى تاڭىندا كۇن اشىق بولدى جانە اۋا تەمپەراتۋراسى 19+ س- تى كورسەتتى. بۇل حالىقتىڭ كورمەنى ەمىن-ەركىن ارالاۋىنا مۇمكىندىك بەردى. كورمە اۋماعىنا كىرگەن ساتتە كوزگە تۇسەتىن ەرەكشە نىسان - «نۇر الەم». بۇل ديامەترى 80 مەتر، بيىكتىگى 100 مەتر قۇرايتىن الەمدەگى ەڭ ۇلكەن سفەرالىق عيمارات جانە استانانىڭ جاڭا سيمۆولى.
كەلۋشىلەر مۇندا قازاقستاننىڭ تاريحى، مادەنيەتى، سالت-ءداستۇرى، كورىكتى جەرلەرىمەن جانە قازاقستان قول جەتكىزگەن جەتىستىكتەرمەن تانىسا الادى. ۇيىمداستىرۋشىلاردىڭ ايتۋىنشا، «نۇر الەمدى» تولىق ارالاپ شىعۋعا 3-3,5 ساعات ۋاقىت كەتەدى. ال تۇتاس پاۆيلوندارمەن تانىس بولۋ ءۇشىن كورمەنى 4 تاۋلىك ارالاۋعا تۋرا كەلەدى. ەكسپو اۋماعىندا جاڭا عيماراتتارمەن قاتار، جاڭا ەسكەرتكىشتەر دە بوي كوتەرگەن.
ەندريۋ رودجەرستىڭ «اشىلمالى ەنەرگيا» اتتى مونۋمەنتى ورناتىلدى. بيىكتىگى 12,5 مەتردى قۇرايتىن بۇل تۋىندى قولا مەن توت باسپايتىن قۇرىشتان قۇيىلعان. ەكسپو-2017 - جاڭا تەحنولوگيالاردىڭ عانا ەمەس، الۋان ءتۇرلى وركەنيەتتەردىڭ دە توعىسقان ورتالىعىنا اينالدى.
سان ءتۇرلى مەملەكەتتەن جينالعان ءتۇرلى ۇلت وكىلدەرى ەكسپو الاڭىندا وزدەرىنە بەيتانىس مادەنيەتپەن تانىسۋ مۇمكىندىگىنە يە بولدى. ەكسپو كورمەسى وتەتىن ءۇش ايدا كورمە اۋماعىندا 4500 ەرىكتى جۇمىس ىستەيتىن بولادى. ولار قازاقستاننىڭ تۇپكىر-تۇپكىرىنەن جينالعان.
ماسەلەن، سۋرەتتەگى جاس ەرىكتىلەر ەكسپوعا قىزمەت كورسەتۋ ءۇشىن الماتىدان ارنايى كەلگەن. ولاردىڭ ايتۋىنشا، ءبىر عانا الماتى قالاسىنان ەكسپوعا 900 ەرىكتى كەلگەن.
ولار كەلۋشىلەرگە جول نۇسقاپ، قاجەت بولعان جاعدايدا كومەك كورسەتەدى. ءبىر پاۆيلونعا جينالىپ قالعان حالىقتى باسقا پاۆيلوندارعا ءبولۋ دە ەرىكتىلەردىڭ مىندەتى. ەكسپونىڭ العاشقى كۇنى بولسا دا، كورمە اۋماعىندا شەتەلدىكتەردىڭ قاراسى كوپ.
سوڭعى دەرەكتەرگە سايكەس، ەكسپو-2017 كورمەسىنە 44 ەلدىڭ وكىلدەرى بيلەت ساتىپ العان. قوناقتاردىڭ كوپشىلىگى قىتاي مەن رەسەيدەن كەلەدى. ەكسپو اۋماعىندا تىنىمسىز تىرشىلىك باستالىپ كەتتى. پاۆيلوننان پاۆيلونعا اعىلعان جۇرت ەرەكشە ديزايندا جاسالعان ساكىلەردە دەمالىپ، جۇرەك جالعاۋ ءۇشىن دۇڭگىرشەك-ءدامحانالاردى جاعالايدى.
ونداعى ءشايدىڭ ورتاشا باعاسى 400 تەڭگەنى قۇرايدى، ال كوفە - شامامەن 700 تەڭگە. فاست-فۋد تاعامدارىن 500-1000 تەڭگە ارالىعىندا ساتىپ الۋعا بولادى. ۇلتتىق تاعامدارىمىزدى دارىپتەيتىن دۇڭگىرشەكتەر دە بارشىلىق.
ءبىراق، ولاردىڭ دا باعاسى ارزان ەمەس. مۇندا ءبىر دانا قۇرتتى 100 تەڭگەگە، ءبىر ستاقان قىمىزدى 500 تەڭگەگە الۋعا بولادى. ەكسپونىڭ ەڭ كىشكەنتاي كەلۋشىلەرى دە نازاردان تىس قالماعان. پاۆيلونداردىڭ جانىندا زاماناۋي ۇلگىدەگى اۋقىمدى بالالار الاڭقايى ورناتىلعان. ەكسپو كەشەنىنىڭ قوقىس تاستايتىن جاشىكتەرىنە قاعاز، بوتەلكە جانە وزگە دە قالدىقتاردى ءبولىپ سالۋ مىندەتتەلگەن، بۇل دامىعان مەملەكەتتەردەگى قالىپتى ءۇردىس.
115 مەملەكەت پەن 22 حالىقارالىق ۇيىم ورنالاسقان بۇل قالاشىقتىڭ سىرت كەلبەتى دە ءوزارا ۇيلەسىم تاپقان. ءار پاۆيلوننىڭ قاسبەتى ۇلتتىق ەرەكشەلىكتەرىنە قاراي، تۇرلىشە بەزەندىرىلگەن. ەكسپو-2017 كورمەسىنىڭ العاشقى كۇنى اياقتالار تۇستا دا كەي پاۆيلونداردىڭ ۇزىن-سونار كەزەگى تاۋسىلمادى.
اسىرەسە، كەلۋشىلەردىڭ باسىم بولىگى شار-سفەردا ورنالاسقان قازاقستان پاۆيلونىن كورۋگە اسىعادى. ودان كەيىن وڭتۇستىك كورەيا مەن قىتايدىڭ پاۆيلوندارىنداعى حالىق قاراسى تولاستار ەمەس. سونداي-اق گەرمانيا مەن موناكو پاۆيلوندارى الدىندا ءبىر توپ ادام كەزەك كۇتىپ تۇر.
كورمەنىڭ العاشقى كۇنى ءساتتى ءوتتى دەۋگە بولادى. وعان كورمە قىزمەتكەرلەرىنىڭ جانە كەلۋشىلەردىڭ ەمەن-جارقىن جۇزدەرى دالەل.
ەسكە سالا كەتسەك، «ەكسپو-2017» حالىقارالىق مامانداندىرىلعان كورمەسى 9- ماۋسىم كۇنى اشىلدى جانە 10- قىركۇيەككە دەيىن جالعاسادى. دەمەك، الداعى ءۇش اي بويى تالاي جاعىمدى جاڭالىقتارعا كۋا بولارىمىز انىق.
اۆتور: ايجان سەرىكجان قىزى
