بيىل 100 مىڭنان استام جاس ءوسپىرىم اسكەري ەسەپكە الىنباق
بۇل تۋرالى قازاقپارات ءتىلشىسى قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
«اسكەري قىزمەت جانە اسكەري قىزمەتشىلەردىڭ مارتەبەسى تۋرالى» قازاقستان رەسپۋبليكاسىنىڭ زاڭىنا سايكەس بيىل ون جەتى جاسقا تولاتىن جاسوسپىرىمدەر تىركەلۋگە جاتادى.
قازىرگى ۋاقىتتا جەرگىلىكتى اسكەري باسقارۋ ورگاندارى ازاماتتاردى اسكەرگە شاقىرۋ ۋچاسكەلەرىنە تىركەۋدى جۇرگىزەدى، ولاردىڭ سانىن، اسكەري قىزمەتكە جارامدىلىعىن انىقتايدى، ءبىلىم دەڭگەيىن، دەنە دايارلىعىن بەلگىلەيدى.
«جەرگىلىكتى اتقارۋشى ورگانداردىڭ شەشىمىمەن مەديتسينالىق كوميسسيالار قۇرىلدى. جاستارمان لاۋازىمدى تۇلعالار اڭگىمە جۇرگىزىپ، ءتيىستى قۇجاتتاردىڭ بار-جوعىن تەكسەرەدى، سودان كەيىن مەديتسينالىق كۋالاندىرۋدان وتەدى»، - دەدى ق ر ق ك باس شتابى ۇيىمداستىرۋ-جۇمىلدىرۋ جۇمىستارى دەپارتامەنتىنىڭ وكىلى پودپولكوۆنيك ازامات دوسىموۆ.
بارلىق تەكسەرۋلەردەن كەيىن جاس وسپىرىمدەرگە شاقىرۋ ۋچاسكەسىنە تىركەۋ تۋرالى كۋالىك جازىلىپ، قولىنا ءبىرىنشى اسكەري قۇجات بەرىلەدى. تىركەۋ ناۋقانى بارىسىندا جاس وسپىرىمدەرگە اسكەري قىزمەتتىڭ ارتىقشىلىقتارى مەن كەلەشەگىن، سونداي-اق ق ر قورعانىس مينيسترلىگىنىڭ وقۋ ورىندارىنا ءتۇسۋ ەرەجەلەرى جونىندە دە ايتىلادى.
ايتا كەتسەك، ازاماتتاردى شاقىرۋ ۋچاسكەلەرىنە تىركەۋ قازاقستاندا جىل سايىن، قاڭتاردان باستاپ ناۋرىزعا دەيىن ءۇش اي بويى جۇرگىزىلەدى. تىركەۋ ناۋقانى سانيتارلىق-ەپيدەميولوگيالىق تالاپتاردى ساقتاۋمەن وتكىزىلەدى.