قازاقستاندا جىل سايىن 100 مىڭ پاتەر سالىنادى - جايىمبەتوۆ
بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە ق ر ۇلتتىق ەكونوميكا مينيسترلىگى قۇرىلىس، تۇرعىن ءۇي- كوممۋنالدىق شارۋاشىلىق ىستەرى جانە جەر رەسۋرستارىن باسقارۋ كوميتەتىنىڭ ءتوراعاسى مارحابات جايىمبەتوۆ ءمالىم ەتتى، دەپ حابارلايدى قازاقپارات.
كوميتەت باسشىسى ۇكىمەتتە «نۇرلى جەر» باعدارلاماسى اياسىندا جىلىنا قانشا تۇرعىن ءۇي پايدالانۋعا بەرىلەتىندىگى جايىندا ەسەپ بار بولعانىمەن اتالعان قۇجات ءالى بەكىتىلمەگەندىكتەن ناقتى دەرەكتەردى جاريا ەتە المايتىندىعىن ايتتى.
«ءبىراق، شامامەن جىلىنا 100 مىڭ، 15 جىلدا 1,5 ميلليون پاتەر سالىناتىن بولادى. ماسەلەن، وتكەن جىلى بۇكىل ەل بويىنشا 78 مىڭ پاتەر سالىنعان ەدى. بۇل شامامەن 9 ميلليون شارشى مەتر تۇرعىن ءۇيدى قۇرايدى. ول جىلىنا شامامەن 5,6 پايىزعا ءوسىپ وتىرادى. ءبىز ءوسىمدى وسى شەكتە بولجاپ وتىرمىز. جالپى، ناقتى ەسەپتەرى بار. دەگەنمەن، باعدارلاما ءالى تولىق قابىلدانباعاندىقتان، ونى جاريا ەتپەي- اق قويايىن»، - دەدى كوميتەت باسشىسى.
سونىمەن قاتار ول ەلىمىز بويىنشا 18 تۇرعىن ءۇي كومبيناتى سالىنعانىن اتاپ ءوتتى.
«ولار مەملەكەت تاراپىنان قولداۋعا يە بولىپ وتىر. شىنىمەن دە تۇرعىن ءۇي كومبيناتتارى ماتەريالدارىنان سالىناتىن ۇيلەردىڭ قۇرىلىسى جەدەل ءارى ارزان بولادى. ءبىزدىڭ ەسەپتەۋىمىزشە، 20-30 پايىزعا ارزان. ال جەدەلدىگىنە كەلەر بولساق، ماسەلەن، 5 قاباتتى ءۇي 6-9 اي سالىنسا، تۇرعىن ءۇي كومبيناتى ماتەريالدارىن پايدالانىپ، 3,4 ايدا ءۇي تۇرعىزۋعا بولادى»، - دەدى جايىمبەتوۆ.
اۆتور: مارلان جيەمباي
