يندۋستريالاندىرۋ كارتاسىنىڭ جوبالارى اي سايىن 100 ميللياردتان استام تەڭگەنىڭ ءونىمىن وندىرەدى

 استانا. قازاقپارات - 2015 - جىلدىڭ 8 ايىندا يندۋستريالاندىرۋ كارتاسىنىڭ جوبالارى 735,9 ميلليارد تەڭگەنىڭ ءونىمىن ءوندىردى، دەپ حابارلايدى ق ر ينۆەستيتسيالار جانە دامۋ مينيسترلىگىنىڭ باسپا ءسوز قىزمەتىنەن.

بۇل وڭدەۋ ونەركاسىبىنىڭ جالپى كولەمىنىڭ %14,5. ورتاشا العاندا اتالعان كاسىپورىندار اي سايىن 100 ميلليارد تەڭگەنىڭ ءونىمىن شىعارادى. ەكىنشى بەسجىلدىقتا قۇنى 8 تريلليون تەڭگە بولاتىن 380 جوبا قولعا الىندى. پايدالانۋعا بەرىلگەندە 60 مىڭ جۇمىس ورنى اشىلادى. 60 جوبا شەتەلدىك ينۆەستورلاردىڭ قاتىسۋىمەن سالىنىپ جاتىر.

يندۋستريالاندىرۋ كارتاسىنىڭ اياسىندا بيىل قۇنى 600 ميلليارد تەڭگەنىڭ 80 جوباسى ىسكە قوسىلادى. ونىڭ ىشىندە پاۆلودار وبلىسىنداعى بوزشاكول ك ب ك (كەن بايىتۋ كومبيناتى)، الماتى وبلىسىنداعى شويىن بالقىتۋ ءوندىرىسى، باتىس قازاقستان وبىلىسىندا К5 ەكوكلاستى موتور مايىن شىعاراتىن ءوندىرىس ورنى بار.