جەمقورلىق تۋرالى حابارلاعاندارعا بەرىلەتىن ەڭ جوعارعى سىياقى 10,6 ميلليون تەڭگە بولادى

نۇر-سۇلتان. قازاقپارات - سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆ پاراقورلار تۋرالى حابارلاعان ادامداردى ىنتالاندىرۋ شارالارى تۋرالى ايتىپ بەردى، دەپ حابارلايدى قازاقپارات ءتىلشىسى.

«ۇكىمەت پرەزيدەنتتىڭ تاپسىرماسىن ىسكە اسىرۋ ماقساتىندا سىبايلاس جەمقورلىق فاكتىلەرى بويىنشا حابارلامالار ءۇشىن ازاماتتاردى كوتەرمەلەۋدىڭ جاڭا جۇيەسى تۋرالى قاۋلىنى بەكىتتى. ەندى ە ى د ۇ قاتارىنداعى كوپتەگەن ەلدەردەگى سەكىلدى سارالانعان سىياقى بولادى»، - دەدى ا. شپەكبايەۆ 2019-جىلدىڭ قورىتىندىسىنا ارنالعان اگەنتتىكتىڭ القا ماجىلىسىندە.

وسى ورايدا ول سىبايلاس جەمقورلىق فاكتىسى تۋرالى حابارلاعان ادام سوتتىڭ ايىپتاۋ ۇكىمىنەن كەيىن پارا سوماسىنىڭ 10 پايىزىن الاتىنىن جەتكىزدى.

«ەڭ جوعارى سىياقى مولشەرى 10 ميلليون 600 مىڭ تەڭگەنى قۇرايتىن بولادى. بۇل جاڭاشىلدىقتار ازاماتتاردى جەمقورلىقپەن ناقتى كۇرەسكە بارىنشا تارتۋعا ەلەۋلى سەرپىن بەرەدى دەپ ەسەپتەيمىز»، - دەدى اگەنتتىك باسشىسى.