جوعارعى سوت ءتوراعاسى: بيىل ەل سوتتارىنا 1,7 ميلليونعا جۋىق ءىس كەلىپ ءتۇستى
قازاقپارات ح ا ا قۇتتىقتاۋدىڭ تولىق ءماتىنىن ۇسىنادى. قۇرمەتتى وقىرماندار! بارشاڭىزدى الدا كەلە جاتقان 2017 - جاڭا جىلمەن قۇتتىقتايمىن! وسى مەرەكە قارساڭىندا ءداستۇر بويىنشا ءوتىپ بارا جاتقان جىلدىڭ قورىتىندىسى شىعارىلادى. بيىل ەل تاۋەلسىزدىگىنىڭ 25 جىلدىعىن مەرەكەلەۋ شەڭبەرىندە رەسپۋبليكامىزدىڭ ساياسي- ەكونوميكالىق سالالارىندا جاڭا جەتىستىكتەرگە تولى ەلەۋلى وقيعالار ورىن الدى. وتاندىق سوت جۇيەسى دە ەلىمىزدىڭ دامۋىنا ءوز ۇلەسىن قوستى.
2016 -جىلى سۋديالار كورپۋسى ۇلت جوسپارىندا كوزدەلگەن ءتيىستى قادامداردىڭ بارلىعىن تابىستى ىسكە اسىردى. ءۇش ساتىلى سوت جۇيەسىنە كوشتىك، سۋديالىققا ۇمىتكەرلەر مەن سۋديالارعا قويىلاتىن تالاپتار ارتتى، جوعارعى سوت جانىنان ينۆەستيتسيالىق داۋلاردى قارايتىن القا، سوت تورەلىگى اكادەمياسى مەن حالىقارالىق كەڭەس قۇرىلدى. سوت ءىسىن جۇرگىزۋدە اقپاراتتىق تەحنولوگيالاردى كەڭىنەن قولدانۋ باعىتىنداعى جۇمىس جالعاسىن تاپتى. سۋديالار قاۋىمداستىعى ءۇشىن ماڭىزدى وقيعا - رەسپۋبليكا سۋديالارىنىڭ VII سەزى ءوتىپ، وندا سۋديالىق ادەپ كودەكسى قابىلداندى. اتالعان جۇمىستاردىڭ بارلىعى تۇرعىنداردىڭ ۇدايى سۇرانىستارى جاعدايىندا زاڭ ۇستەمدىگىن ىسكە اسىرۋدىڭ جوعارى تيىمدىلىگىن قامتاماسىز ەتۋگە مۇمكىندىك بەردى.
اعىمداعى جىلى ەل سوتتارىنا 1,7 ميلليونعا جۋىق ءىس پەن ماتەريال كەلىپ ءتۇستى. ىستەردى قاراۋ مەرزىمى بارىنشا قىسقارىپ، سوت تورەلىگىن جۇزەگە اسىرۋدىڭ ساپاسى ارتتى. سوت پروتسەستەرىنە قاتىسۋشىلار اراسىندا جۇرگىزىلگەن ساۋالنامالاردىڭ بارلىعى سوتتارعا دەگەن سەنىمنىڭ تۇراقتى تۇردەگى جوعارى دەڭگەيىن كورسەتتى. كەلەر جىلى سوت جۇيەسىن جاڭعىرتۋ جۇمىستارى جالعاساتىن بولادى.
باسىم مىندەتتەر قاتارىندا - رەسپۋبليكا سۋديالارىنىڭ VII سەزىنىڭ تاپسىرمالارىن ىسكە اسىرۋ، ىستەردى قاراۋدىڭ ساپاسى مەن جەدەلدىگىن ودان ءارى ارتتىرۋ، سونداي- اق سوت تورەلىگى جۇيەسىنىڭ ايقىندىعى مەن قولجەتىمدىگىن قامتاماسىز ەتۋ. جاڭا جىل - بارشانى بىرىكتىرىپ، كوڭىلگە ەرەكشە شابىت پەن جارقىن ءۇمىت سىيلايتىن، بارلىعىمىز قۋانا قارسى الاتىن وتباسىلىق مەرەكە! تورىمىزگە قادام باسقان 2017 -جىل ءاربىر شاڭىراققا بەرەكە- بىرلىك، مولشىلىق جانە تولايىم تابىس الا كەلسىن، ارماندارىمىز ورىندالىپ، ءار ىسىمىزگە ساتتىلىك سەرىك بولسىن! سىزدەرگە جانە سىزدەردىڭ جاقىندارىڭىزعا زور دەنساۋلىق، كاسىبي جەتىستىكتەر مەن باياندى باقىت تىلەيمىن! جاڭا جىل قۇتتى بولسىن!
قازاقستان رەسپۋبليكاسى جوعارعى سوتىنىڭ ءتوراعاسى قايرات ءمامي
