بالا ءبىر جاسقا تولعانشا تولەنەتىن جاردەماقى 1,5 جىلعا دەيىن ۇزارۋى مۇمكىن

نۇر-سۇلتان. قازاقپارات - الداعى ۋاقىتتا بالا كۇتىمىمەن اينالىساتىن قازاقستاندىقتار مەملەكەتتىك جاردەماقىنى 1 جىل ەمەس، 1,5 جىل بويى الۋى مۇمكىن.

بۇل تۋرالى و ك ق- دا وتكەن بريفينگ كەزىندە مەملەكەتتىك الەۋمەتتىك ساقتاندىرۋ قورى ا ق باس ديرەكتورى نۇرسۇلۋ كەمەل مالىمدەدى، دەپ حابارلايدى قازاقپارات ءتىلشىسى.

«ءبىز الەۋمەتتىك كودەكس اياسىندا بالا كۇتىمىنە بەرىلەتىن مەملەكەتتىك جاردەماقى مەرزىمىن 1 جىلدان 1,5 جىلعا ۇزارتۋدى ۇسىنىپ وتىرمىز. قوردىڭ قىزمەتى الەۋمەتتىك جاردەماقىنى تولەۋمەن عانا شەكتەلمەيدى. ءبىز جالپى جۇيەنىڭ، ونىڭ ىشىندە قارجى تۇراقتىلىعىن ساقتاۋعا جاۋاپتىمىز. جالپى الەۋمەتتىك مىندەت - ۇزاقمەرزىمدى شارۋا. دەگەنمەن ءدال قازىر بالا كۇتىمىنە بايلانىستى جاردەماقىنى تاعايىنداۋ مەرزىمىن ۇزارتۋعا قاتىستى ناقتى ەشتەڭە ايتا المايمىن»، - دەدى نۇرسۇلۋ كەمەل تىلشىلەردىڭ سۇراعىنا جاۋاپ بەرە وتىرىپ.

ونىڭ ايتۋىنشا، قازىر اتالعان ماسەلە تالقىلانىپ جاتىر. قورىتىندى شەشىم كوپشىلىككە جاريالانادى.

«سونىمەن قاتار اسىراۋشىسىنان جانە ەڭبەك قابىلەتىنەن ايرىلعان جاعدايدا بەرىلەتىن جاردەماقىنىڭ دا ماڭىزى زور. بۇگىندە اتالعان جاردەماقى ءتۇرىن 160 مىڭنان استام ادام الىپ وتىر»، - دەيدى ول.

ايتا كەتسەك، قازىر ەلىمىزدە 1 جاسقا دەيىنگى بالا كۇتىمىنە ارنالعان تولەمنىڭ ورتاشا مولشەرى - 41 مىڭ تەڭگە.

بۇعان دەيىن قور باسشىسى الەۋمەتتىك تولەمدەردىڭ قالاي تاعايىندالاتىنىن ەسەپتەپ بەرگەن ەدى.

سونداي-اق، اسىراۋشىسىنان ايرىلعان وتباسىلارعا بەرىلەتىن جاردەماقىنىڭ %9 ارتقانى ايتىلدى.