ەسەپ كوميتەتى پرەزيدەنتكە ءۇش جىلدا جۇمسالاتىن 1,16 تريلليون تەڭگەنى وڭتايلاندىرۋدى ۇسىندى
نۇر-سۇلتان. قازاقپارات - مەملەكەت باسشىسىنا 2022-2024-جىلدارعا ارنالعان رەسپۋبليكالىق بيۋجەتتىڭ جوباسىنا جۇرگىزىلگەن الدىن الا باعالاۋدىڭ نەگىزگى ناتيجەلەرى جونىندە باياندالدى، دەپ حابارلايدى اقوردانىڭ باسپا ءسوز قىزمەتى.
ناتاليا گودۋنوۆانىڭ مالىمەتىنە سايكەس 9 باسىم باعىت بويىنشا ءۇش جىلدا جۇمسالاتىن 3,2 تريلليون، ونىڭ ىشىندە 2022-جىلعا جوسپارلانعان 1,2 تريلليون تەڭگە كولەمىندەگى قارجىعا باعالاۋ جۇرگىزىلدى.
ونىڭ قورىتىندىسى بويىنشا ەسەپ كوميتەتى جۇمسالاتىن 1,16 تريلليون تەڭگەنى، ونىڭ ىشىندە 2022-جىلعا جوسپارلانعان 306,3 ميلليارد تەڭگەنى وڭتايلاندىرۋدى ۇسىندى.
بيۋجەتتى جوسپارلاۋ كەزىندە جىبەرىلگەن ءبىرقاتار كەمشىلىك ايتىلدى. ءتيىستى ورگاندارعا ولاردى جويۋ جونىندە ناقتى ۇسىنىستار بەرىلدى. سونىمەن قاتار ەسەپ كوميتەتىنىڭ ءتوراعاسى جەكەلەگەن اۋديتورلىق ءىس-شارالاردىڭ الدىن الا قورىتىندىلارى تۋرالى ايتتى.
كەزدەسۋ قورىتىندىسى بويىنشا قاسىم-جومارت توقايەۆ مەملەكەتتىك اۋديت جانە قارجىلىق باقىلاۋ ورگاندارىنىڭ قىزمەتىن جەتىلدىرۋ جونىندە ءبىرقاتار ناقتى تاپسىرما بەردى.
